DILI (timorpost.com) — Timor Leste reprezenta husi Diretora Jerál Prestasaun Servisu Saúde, Doutora Odete da Silva Viegas, partisipa reuniaun nivel altu SIDS (Small Island Developing State) iha Barbados nu’udar nasaun ida iha illa Karibia.
Timor Leste hetan konvite husi Organização Mundial da Saúde (OMS) hola parte iha reuniaun ne’e hanesan mós membru ida husi SEARO (Rejiaun Sudeste Aziátiku).
Husi SEARO, nasaun rua mak partisipa inklui Timor Leste ho Maldivas. No Timor Leste hetan priviléjiu sai hanesan moderadór ba plenária tolu ne’ebé ko’alia kona-ba Moras La Hada’et no Saúde Mental relasiona ho mudansa klimátika no situasaun emerjénsia saida de’it.
Doutora Odete ba Timor Post subliña, Timor Leste nia partisipasaun iha forum ne’e importante tebes hanesan nasaun ne’ebé okupa moras la hada’et ne’ebé boot inklui ema ho moras mental, hodi bele fahe esperiénsia ba malu liuliu kona-ba meius sira ba prevensaun nian.
“Primeira vés Timor Leste partisipa hodi hetan esperiénsia no fahe mós esperiénsia iha sesaun diskusaun,” Doutora Odete subliña.
Iha Timor Leste, Doutora Odete subliña, moras mental sai mós hanesan moras ne’ebé prioridade ba Ministériu Saúde, loron ba loron moras mental aumenta hanesan país post konflitu depois de tinan 20 ukun rasik-an.
“Ita ukun-an presiza atu fó liu tan atensaun ba programa prioridade no urjénsia, hosi parte finanseiru, rekursu umanu, apoiu diagnóstiku ba ekipamentu nune’e mós ho ai-moruk ho resgentes sira no ikus servisus lojístika hotu.” Doutora Odete hatete.
Apoiu sira ne’e tenke komprensivu no imediatu hodi nune’e mak tékniku implementadór sira bele responde ba situasaun emerjénsia no ba servisu elektivos hotu.
Nia dehan, dalan ida ne’e mak bele fó ba populasaun sira bele hetan atendimentu ne’ebé ho tempu no kualidade.
Atividade ne’ebé hala’o durante loron rua, 17 – 18 Janeiru 2023 iha Hotel Hilton Barbados ne’e abertura husi Ministru Saúde Barbados no taka husi Ministra Estatal Barbados.
2,686 total views, 3 views today
Bele hare Video Seluk :
Subscribe to Timorpost
