DILI (timorpost.com) – Primeiru Ministru, Taur Matan Ruak, partisipa serimónia kona-ba Grande lansamentu Aero Dili A320, ne’ebé atu moderniza Timor-Leste bele la’o ba oin, tanba ne’e lori inisiativa atu dezenvolve Timoroan no sidadaun hot-hotu bele la’o viajen ho fasil no seguru.
“Iha serimónia lansentu ba Aero Dili A320 ne’e partisipa hosi Primeiru-Ministru, Taur Matan Ruak no Vise Primeiru Ministru no Ministru Planu Ordenamentu no membru Governu sira”, informasaun ne’e hateten hosi Diretór Kompania Aero Dili, Lourenço Oliveira, ba media públiku, Domingu (23/01).
Tuir Diretór Kompania Aero Dili, Lourenço Oliveira, hato’o agradese no graças maromak nian iha tinan 2023 ne’e, Timor-Leste iha ona aviaun rasik, hodi bele loke luan liutan planu dezenvolvimentu ne’e iha futuru ho estábilidade.
“Graças maromak nian, tanba halo ita bele sérvisu makas hodi envolve iha parte oin-oin ne’ebé Timor-Leste iha ona aviaun rasik, no hanaran Timor-Leste nia aviaun”, hateten Lourenço Oliveira.
Iha intervensaun Xefe Governu konsidera momentu ne’e istóriku ba Timor-Leste, tanba Timoroan ne’ebé iha korajen no determinasaun hodi so’e-an ba projetu bo’ot ne’e.
Lider másimu VIII Governu Konstituisionál sente kontente no enkoraja emprezáriu timor-oan hotu, atu halibur esforsu nune’e bele tulun malu kompete hodi nune’e bele fó kondisaun ba kliente sira ho presu folin baratu.
“Ha’u kontente liu bainhira Senór Prezidente hatete katak nakloke ba sé de’it sosa kompania nia asaun, ha’u enkoraja emprezáriu timor-oan sira, para halibur esforsu ajuda timor-oan ida ne’e, ha’u espera tinan ruanulu (20) mai, no tinan ruanulu ba kotuk, ita bele iha, mas espera tinan oin mai la’ós ida ne’e de’it mais espera ajuda ita hodi kompete ho ita-nia sidadaun sira la’ós de’it dada mundu besik mai ita mas liu-liu kompete ho oportunidade fó kondisaun ba ita-nia kliente sira presu ida ne’ebé razoavél,” nia dehan.
Serimónia ba Aero Dili A320 ne’ebé marka prezensa iha Serimónia ne’e, Primeiru-Ministru, Taur Matan Ruak no Eis Primeiru Ministru, Mari Alkatiri, no bainaka importante sira seluk.
“Ita orguillu ba ita-nia mudansa dezenvolvimentu Aero nian, no ohin loron Timor-Leste bele iha Aeroplan rasik ho marka Aero Dili A320, no fiar katak futuru nasaun Repúblika Demokrátika Timor-Leste (RDTL), bele industrializa liu-tan ba ita-nia dezenvolvimentu nasionál, ba transporte públiku, husi Aero, Marítima, no Terrestre nian ho estábilidade.” tenik nian.
2,628 total views, 6 views today
Bele hare Video Seluk :
Subscribe to Timorpost
