Dili (timorpost.com) – Governu Timor-Leste liuhusi Ministériu Finansas (MF), asina akordu ho Governu Australia kona-ba Mega Projetu Dili International Aeroportu Nicolau Lobato, hodi fasilidade manutensaun Aeroportu foun hadi’a fatin Depózitu kombustivel nian, servisu eletrisidade, liga bee-moos no bee dalan.
“Governu Austrália ho Timor-Leste ohin asina ona akordu finanseiru ba renovasaun Aeroportu Internasionál Prezidente Nicolau Lobato iha Dili, liuhusi Australian Infrastructure Financing Facility for the Pacific (AIFFP), Pakote renovasaun ida ne’e sublirñia Austrália nia kometimentu atu suporta Timor-Leste nia rekuperasaun, diversifikasaun no reziliénsia ekonómika iha rai laran. Hanesan portaun prinsipál internasionál nasaun nian, aeroportu maka xavi ida atu hasa’e oportunidade ekonómiku Timor-Leste nian”, Asistente Sekretáriu Primeiru, Divizaun Maritima, Ridwaan Jadwat, dehan iha Salaun Nobre MNEK, Pante-Kelapa, Kinta (15/12).
Nia dehan, Australia ho Banku Dezenvolvimentu Aziátiku (ADB), Ajénsia Japaun ba Kooperasaun Internasionál (JICA) no Korporasaun Finanseira Internasionál (IFC) hanesan Timor-Leste nia parseiru iha projetu renovasaun aeroportu ida ne’e.
No Austrália nia kontribuisaun inklui área infraestrutura kritika sira, hanesan hadi’ak asesu ba estrada ba terminal aeroportu nian, eletrisidade, no fasilidade ba ekipa bombeiru no saúde nian. Austrália nia investimentu ida ne’e dezeña ona ho objetivu atu hadi’ak povu Timor nia moris no masimiza empregu lokál, liuliu ba feto sira.
“Pakote finanseiru konsesional ida ne’e mak Austrália nia empréstimu bilateral dahuluk ba Timor-Leste, ida ne’e marka momentu importante ida iha ita-nia relasaun bilaterál. Pakote ho montante millaun 97.7AUD (68.4USD) ida ne’e mai husi empréstimu hamutuk millaun 57.1AUD (40.0USD) no millaun 40.6AUD (28.4USD) kontribuisaun finanseiru husi AlFFP”, nia dehan.
Hanesan kredór ne’ebé boot liu iha rejiaun ne’e, Austrália iha kometimentu atu lori projetu infraestrutura ne’ebé sustentavel, liuhusi AlFFP ne’ebé servisu tuir padraun internasionál nian no sei la impoin tusan ne’ebé la sustentavel. Governu Austrália mós fó apoiu finanseiru ba projetu preparasaun sira liuhusi sira-nia programa Parseiru ba Infraestrutura.
Alende ne’e Ministru Finansas, Rui Agusto Gomes, afirma Governu Timor-Leste no Australia anunsia parseria foun liuhusi Australian Infrastruture Financing Facility for the Pacific (AIFFP), ho pakote finanseiru ho millaun 68.4 USD konsesionál ba reabilitasaun Aeroportu Internasionál Prezidente Nicolau Lobato iha Dili. lda ne’e empréstimu ba nasaun dahuluk husi Australia fó ba Timor-Leste.
“Pakote finanseiru ida ne’e inklui empréstimu millaun 40 USD no kontribuisaun millaun 28.4 USD liuhusi AIFFP no programa bilaterál Department of Foreign Affairs and Trade, Governu Austrália nia kontribuisaun inklui mós apoiu husi nia programa Parseiru ba Infraestrutura ne’ebé fó fundu ba atividade preparasaun sira ba projetu refere”, nia tenik.
Austrália nian ne’e sei kompleta servisu adisional ne’ebé realiza daudaun ona iha aeroportu, hanesan harii pista foun ne’ebé hetan apoiu husi Banku Dezenvolvimentu Aziátiku (ADB) no harii terminál foun ne’ebé hetan apoiu husi Ajénsia Japaun ba Kooperasaun Internasionál (JlCA) nian.
Austrália nia investimentu ida ne’e sei kontribui ba komponente kritika sanulu-resin-tolu iha área infraestrutura rai nian, ida ne’e inklui hadi’ak kapasidade komérsiu liuhusi harii edifísiu foun ba terminál kargu, no mós instalasaun fasilidade karantina ba animál no ai-horis sira. Iha ne’ebá sei iha asesu di’ak liu ba terminál aeroportu nian liuhusi hadi’ak asesu ba estrada no la’o fatin, no mós renovasaun karreta sira-nia para fatin no fatin tula/hatún pasajeiru sira ne’ebé ba aeroportu.
“Ba pasajeiru no funsionáriu aeroportu sira-nia asesu ba saúde no seguransa sira sei hadi’ak tan liuhusi konstrusaun edifísiu ba ekipa bombeiru iha aeroportu, fasilidade saúde primária no hadi’ak moru ne’ebé seguru liután. Iha area besik aeroportu sira mós sei halo mudansa di’ak liu hanesan harii ponte foun iha mota Komoro no eskola primária foun iha Beto Tasi. Ikus liu, projetu ida ne’e sei suporta operasaun no manutensaun aeroportu ida husi instalasaun fasilidade manutensaun aeroportu foun, hadi’ak fatin depózitu kombustivel nian, servisu eletrisidade no liga ahi foun, bee-moos no bee-dalan”, nia hakotu.
3,135 total views, 3 views today
Bele hare Video Seluk :
Subscribe to Timorpost
