DILI (timorpost.com) – Governu liuhosi Ministériu Solidariedade Sosiál no Inkluzaun (MSSI), implementa programa subsídiu fim do Ano, Koordenadór Subsídiu Munisípiu Dili, Luis da Costa, informa kargu diretór husi Ministériu balun simu hotu 200 USD, maski ho saláriu mensal 500 USD ba leten.
Nia hatete, iha dekretu Lei artigu 37, alterasaun 82, katak ema ne’ebé hetan rendimentu 500 USD, laiha diretu atu simu, tanba antes programa ne’e la’o ekipa no Autoridade lokál esplika, maibé realidade sira la kompriende, entaun diretór ne’e mai simu nafatin.
“Ami haruka tékniku aponta hela, aban-bainrua pagamentu hotu ami sei aprezenta ba superior sira husu tuir diretór ne’e servisu iha Ministériu balun nia saláriu hira, se nia saláriu menus husi 500 USD ne’e bele, tuir ita-nia haree ho realidade kargu diretór ne’e labele ona, xefe departamentu de’it mós la simu ona, satan diretór, sira mai simu ami hetan hela”, informa nia iha resintu MSSI, Kaikoli, Kinta (15/12).
Nia dehan, bainhira pagamentu remata ekipa sei hato’o ba superior sira atu prosesu halo oinsá ne’e kompeténsia nasionál, ekipa ezekuta de’it programa no mós fahe informasaun ba sira.
Ministériu relevante sira ne’ebé toma atensaun ba subsídiu ne’e, parte Komisaun Anti Korupsaun (KAK), no Providoria dos Direitos Humanos e Justica (PDHJ), no mós Tribunál Rekursu, mak iha kompeténsia atu buka tuir halo prosesu tuir lei ne’ebé vigor.
“Durante ha’u akompaña membru Governu ka eis titular ou Parlamentu ne’e laiha, tanba ema ne’e kompriende di’ak, so ha’u haree ho matan parte Komandante eskuadra balun iha Munisípiu Dili mós simu, maibé ha’u labele temi”, katak nia.
Nia hatene, Komandante Eskuadra balun simu ho dadersan, maibé hetan presaun husi Komandante PNTL, entaun loraik nia entrega fali osan, entre nia husu deskulpa ba ekipa, ema hanesan ne’e nia kompriende lei.
Nia haktuir, Diretór balun simu hotu nonok de’it, parte balun halo antendimentu, pagamentu hotu mak hato’o dadus ba superior, tanba ema ne’ebé saláriu 500 USD ba leten simu hotu.
Tanba Lei la hatete obriga tenke simu, lei hatete de’it benefisiáriu ne’ebé saláriu la to’o 500 USD, nia bele simu, maibé diretór ne’e nafatin simu mai ho razaun oioin, dala-ruma haruka fen ka subrinu mak simu, entaun ekipa fasilita pagamentu hotu Ministériu relevante sira sei buka tuir.
“Durante pagamentu la’o ekipa hetan ho matan, maibé nu’udar funsionáriu ida ka superior ida ha’u labele intervein, tanba Autoridade lokál, xefe suku esplika de’it mós sira lakohi kontinua mai simu, bele simu maibé loron seluk ema bolu ita boot nia naran ita mak iha responsabilidade ba atitude ne’e”, dehan nia.
2,356 total views, 3 views today
Bele hare Video Seluk :
Subscribe to Timorpost
