DILI (Timor Post)—Deputadu Bankada Partidu Kmanek Haburas Unidade Nasionál Timor-Oan (KHUNTO), Luis Roberto da Silva, hatete, Timor-Leste livre ona husi kolonializmu no invazaun sira, maibé ekonomikamente seidauk livre no ukun aan, tanba polítika nunka iha apoiu ba malu, hodi haburas nasaun nia futuru.
“Los dunik katak ita livre ona husi torturasaun husi kolonializmu no invensaun sira, maibé ekonómikamente, ita sei nafatin atan, tanba ita nia polítika haruka joven haksoit hotu ba estranjeiru, ita hatama estranjeiru sira mai, hodi loke warung bakso, martabak, buat oan sira ne’e ita bele halo, maibé tanba sá mak governu la haree ba ida ne’e” nia dehan iha Plenária PN.
Deputadu ne’e hatete, tempu agora la’ós buka fó sala ba malu, tanba nasaun ne’e povu tomak sosa ho ruin no ran nune’e mak presiza luta maka’as hodi hadi’a ekonomia rai laran, labele mai persuazivu barak maibé asaun mamuk.
Tuir nia, polítika deferénsia ideas ne’e normal, hodi hadi’a nasaun ne’e, loke kampu traballu ba joven sira, haburas ekonomia rai laran, la’ós mai ho polítika indivíduu, katak ukun ho personalia, ne’e la’ós polítika ida ne’ebé di’ak no dignu ba povu sira iha sosiedade.
Nia husu ba partidu hot-hotu, oinsá halo refleta ba ida ne’e, no hanesan reprezentante povu, husu ba lider nivel altu sira atu labele arrogante demais iha polítika de’it, maibé refleta didi’ak hodi kria polítika ne’ebe sai estabilidade no pás iha rai laran.
2,645 total views, 3 views today
Bele hare Video Seluk :