DILI, (timorpost.com)— Banku Nasionál Komérsiu Timor-Leste (BNCTL, sígla Portugés), ohin (09/02) inagura ka loke tan nia ajénsia rua mak hanesan, ida iha Golgota Kumoro no ida seluk iha Sakato, Rejiaun Administrativa Espesiál Oekusi Ambeno (RAEOA).
Prezidente Konsellu Administrasaun BNCTL, Lúcia da Cruz Flor, iha nia diskursu dehan, serimónia inagurasaun ne’e halo tanba servisu maka’as husi Konsellu Ezekutivu BNCTL nian tomak.
“Agradese tebes ba jerente sira no komisaun ezekutivu tomak ne’ebé durante servisu maka’as nune’e ohin ita bele hakat tan pasu ida ne’ebé mak importante tebes iha BNCTL ninia istória”, Prezidente Konsellu Administrasaun BNCTL, Lúcia da Cruz Flor, informa iha Golgota, Kumoro, Sesta-feira, (09/02).
Nia hatutan, ajénsia ida-ne’e kria kondisaun hodi serví kliente sira hotu husi parte Kumoro nian tesik mai, maske iha Dili laran ajénsia BNCTL iha fatin barak ona.
“Ita hotu esforsu hodi hadi’a di’ak liután husi servisu dentru husi banku no mós sei halo ho produtu servisu sira ne’ebé mak agora daudauk ita oferese ba kliente sira hotu hanesan servisu movel, atu halo sira-nia servisu”, nia deklara.
Nune’e nia husu ba ekipa tomak BNCTL kontinua esforsu maka’as liután atu nune’e kliente sira bele kontente sida mak banku oferese ba sira hotu.
“Ha’u fiar ohin loron ita sei kontinua ohin, aban no aban bainrua nune’e lori BNCTL kontinua la’o ba oin nafatin no halo kliente sira kontente liután”, nia hatete.
Tanba ne’e, ho prezensa ajénsia ida ohin loke tan ne’e hanesan estende tan kobertura sira iha Dili de’it, maske iha Dili ajénsia barak ona maibé kliente sira kontinua forma naruk, tanba ne’e ohin prezensa ida-ne’e bele fasilita no ba oin sei loke tan iha parte Taibesi nian.(*)
3,162 total views, 6 views today
Bele hare Video Seluk :
Subscribe to Timorpost
