DILI (timorpost.com)—Kompañia Lotaria Grand Dragon (GD), servisu hamutuk ho operadór telekomunikasaun Telemor, liuhosi aplikasaun Mosan hodi aplika jogu lotaria no pagamentu ba kliente sira ne’ebé manan.
“Ami agradese ba kliente sira ne’ebé iha munisípiu, daudaun ne’e aplika jogu lotaria grand dragon liuhosi aplikasaun Mosan, sistema ne’e atu fasilita kliente sira bele jogu tuir online de’it, nune’e labele la’o dook,” hateten CEO Lotaria Grand Dragon, Datuk Harry, iha Timor Plaza, Sesta (02/06).
Nia esplika, aplikasaun Mosan ho promosaun deskontu porsentu 15 ba kliente sira, hahú hosi fulan ne’e too loron 31 fulan Dezembru tinan 2023.
LGD servisu hamutuk ho telekomunikasaun Telemor iha fulan hirak liubá, kliente barak mak uza ona aplikasaun Mosan hodi joga lotaria dragon ne’e, meius ida ne’e atu kliente sira labele gasta tempu la’o dook, hodi joga lotaria dragon nian.
Telemor Mosan, Diretór of Telemor Fintech, Phung Trung Dung, apresia ho Lotaria Grand Dragon ne’ebé agora halo servisu liuhosi aplikasaun Mosan.
“Mosan apresia tebes ba kooperasaun ida ne’e, liuhosi promosaun deskontu 15% sentavu 0,50 bainhira kliente sira halo pagamentu ba Grand Dragon liuhosi Mosan, sei transfere 15% ho montante osan diretamente ba iha kliente sira nia konta”, nia esplika.
Telekomunikasaun Telemor liuhosi aplikasaun Mosan hala’o kooperasaun ho Governu Timor-Leste liuhosi Ministériu Solidariedade Sosiál no Inkluzaun (MSSI), atu halo prosesu pagamentu ba programa bolsa da mãe.
Iha serimónia ne’e, hetan partisipasaun másimu husi LGD, Telemor, Inspesaun Jerál Jogu (IGJ) inklui mós kliente Mosan husi munisípiu balun.
Kliente Mosan no Lotaria Grand Dragon, Agostinho de Jesus, hala’o hotu jogu lotaria liuhosi aplikasaun Mosan ho konfortavel tebes, importante rede internet garantia.
“Aplikasaun Mosan foin lalais sira halo kooperasaun ho Lotaria Grand Dragon, fofoun ha’u mós ladún hatene, depois ha’u koko di’ak, tanba fasil ba ita atu labele la’o dook buka ema sira ne’ebé fa’an na’in ne’e”, nia konta.
Aplikasaun ne’e di’ak no konfortavel tebes ba kliente LGD sira hodi implementa iha sira nia telemovel rasik, importante mak rede internet iha hodi bele asesu ba jogu lotaria ne’e.
Mosan iha Kliente 300.000
Operasaun Telekomunikasaun Telemor, liuhusi aplikasaun Mosan eziste tinan lima ona konsege atinje kliente hamutuk 300.000 no ajente hamutuk 2.100, ne’ebé agora estabelese iha territóriu laran tomak.
“Kliente Mosan iha territóriu laran tomak hamutuk 300.000 no ajente Mosan 2.100, daudaun ne’e ajente Mosan eziste iha kada suku iha Timor laran tomak,” Diretór of Telemor Fintech, Phung Trung Dung, informa iha Lotaria Grand Dragon Timor Plaza, Sesta (02/06).
Aplikasaun Mosan eziste durante tinan lima ona, nune’e hafasil kliente sira bele asesu ba sira-nia direitu. Nune’e mós Mosan hala’o pagamentu pulsa eletrisidade, loja sira no sosa pulsa telemovel liuhosi aplikasaun ne’e.
Telemor liuhosi aplikasaun Mosan hala’o parseira ho Governu no Setór Privadu sira, atu hafasil kliente sira asesu ba tranzasaun osan no di’ak no konfortavel.
“Planu ba tinan lima oin mai, Mosan sei kontinua ba iha area dijitál nian, hodi bele ajuda kliente sira, atu halo tranzasaun ruma. Objetivu mak Mosan hakarak halo kliente sira liuliu povu Timor-Leste ho fasil”, nia promete.
Mosan mós garantia kliente sira nia osan sei la lakon bainhira hala’o tranzasaun ba konta bankária, nune’e Mosan hetan kontrola diretamente husi Banku Sentrál Timor-Leste (BCTL) no kada fulan BCTL sempre hala’o auditoria ba servisu Mosan nian.
“Kada fulan Banku Sentrál sempre mai halo audit ka check ba servisu Mosan no ami garantia katak kliente sira ne’ebé mak halo prosesu tranzasaun liuhusi Mosan sei seguru”, nia hateten.
Nia mós garantia seluk mak kuandu kliente halo tranzasaun sei simu kedas mensajen ruma liuhusi telemovel, nune’e kliente sira bele asiste rasik sira nia osan ne’ebé iha.
Entretantu, Kliente Mosan, Agostinho de Jesus, apresia ho aplikasaun Mosan ne’ebé hafasil sira atu asesu ba osan ne’ebé sira halo tranzasaun, liuliu sosa pulsa eletrisidade no pulsa telemovel inklui hala’o tranzasaun ba família sira ne’ebé hela dook.
“Aplikasaun Mosan ne’ebé Telemor oferese di’ak tebes, tanba ita la presiza ba iha banku hodi forma, maibé husi Mosan ita bele asesu ona osan ne’ebé ita iha, liuliu tranzasaun sira ne’e ho konfortavel”, nia hakotu.
1,993 total views, 6 views today
