DILI (timorpost.com) – Consellu Combatente Libertasaun Nasionál (CCLN) husu ba Ministériu Edukasaun (ME) tenke tau profesór ne’ebé iha esperiénsia barak mak bele hanorin estudante sira.
Prezidente CCLN, Vidal de Jesus Pinto “Riak Leman”, hatete, profesór kontratadu 2023, hala’o enkontru ho CCLN ne’e, tanba profesór sira mai nu’udar veteranu, no profesór sira mós hato’o sira nia problema kona-ba sira nia kontratu remata ona iha loron 31 Dezembru 2023.
“Nu’udar Timoroan problema sira hanesan ne’e ita hotu nian, ho ida ne’e mak ita nia preokupasaun ne’e halai liu ba ita nia oan sira, hanusa mak ita nia oan sira sai kualidade iha edukasaun, maibé kona-ba hapara kontratadu ne’e kompeténsia husi Ministériu Edukasaun nian, no ami nu’udar veteranu la’o tuir saida mak hakerek iha estatutu CCLN nian,” nia hateten ba Jornalista Sira iha eis Arte Moris Komoro, Kuarta (08/07).
Nia hatete, misaun husi CCLN nian mak asegura pás estabilidade ba libertasaun, no veteranu sira mós partisipa dezenvolvementu, ho nune’e edukasaun ne’e parte husi atividade governu nian.
Tanba ne’e, CCLN husu ba Ministériu Edukasaun atu halo ezersisiu maka’as iha ministériu nia laran, atu haree profesór sira ne’ebé mak iha esperiénsia barak ona.
“Ministériu Edukasaun tenke halo ezersisiu iha ministériu nia laran, atu haree profesór sira ne’ebé mak iha esperiénsia barak, no hanorin kleur ona, duké ita ba hatama fali ema foun iha ne’eba mak hanorin fali ne’e susar tebes,” nia hateten.
Tanba ne’e servisu ne’ebé mak iha rai ida ne’e presiza ema ne’ebé mak matenek, atu nune’e bele hanorin estudante sira ho di’ak hodi sai matenek.
Iha fatin hanesan, Portavoz profesór kontratadu, Agustinho Pinto, hatete, objetivu hala’o enkontru ho Conselu Combatente Libertasaun Nasionál ne’e, relata problema ne’ebé mak profesór kontratadu sira hasoru, tanba Ministériu Edukasaun la rekoñese profesór kontratadu sira iha tinan 2023.
“Tanba veteranu nu’udar orgaun konsultivu husi estadu nian, no mós asegura pás no estabilidade no kontribui ba dezenvolvimentu, tanba ne’e mak ami mai hato’o ami nia lamentasaun ne’ebé mak Ministériu Edukasaun halo ba ami,” nia dehan.
Tuir nia, CCLN mak nu’udar aman veteranu, tanba ne’e mak fó hanoin ba governu liuliu Ministériu Edukasau atu fó solusaun ba profesór kontratadu sira ninia problema ne’e.
Agustinho hatutan, husi parte CCLN promete sei buka solusaun, atu nune’e governu bele rezolve problema sira ne’ebé mak profesór sira hasoru tanba estudante sira mak sai vítima ba prosesu aprendizajen.
“Veteranu sira husu ba ami atu pasiensia hodi hein prosesu tanba prezidente lamenta ho situasaun ne’ebé mak Ministériu Edukasaun deside, tanba haree ba ami nia durasaun servisu. Tanba voluntariu ne’e han tempu naruk pois mak hetan rekoñesimentu husi oitavu governu, no lolos ne’e kontinua ami nia kontratu ou bele tama ona ba ingressu espesiál, se tuir durasaun servisu ne’e,” nia hateten.
16,533 total views, 3 views today
Bele hare Video Seluk :
Subscribe to Timorpost
