Dili(timorpost.com)— Jogu kontinuasaun Liga Futeból Timor-Leste (LFTL), segundu divizaun, ekipa As Marka hikis Kablaki Fc ho rezultadu ikus 2-1.
Jogu primeiru parte atu hahú ekipa rua tun kedas ho nia estratéjia ne’ebé mak sira prepara durante semana ida nia laran sira treinu, tanba haree ba jogu dahuluk ne’ebé mak ekipa rua halo, derrota ho sira nia adversáriu sira.
Nune’e iha jogu segundu ne’e ekipa rua hakarak ka lakohi tenke manan nune’e bele hetan netik Pontus tolu hodi bele salva sira nia ekipa iha Liga Timorense divizaun segundu époka 2023 ne’ebé mak realiza iha Estádiu Munisipál Dili.
Tanba ne’e ekipa rua tun kedas ho ida-idak nia formatu tuir treinadór sira prepara, atu nune’e bele hetan oportunidade barak liután hodi hatama golu ba malu, tanba ekipa Kablaki Fc antes ne’e lakon ona dala ida iha jogu dahuluk semana kotuk liubá.
Nune’e mós hanesan ekipa As Marka, tenke tun ho armada sira ne’ebé mak preparadu ona, tanba sira mós lakohi atu simu derrota no sira nia prinsípiu hakarak kontinua sira nia vitória ne’ebé mak sira hetan iha semana kotuk.
Maibé ekipa As Marka lakohi halimar hodi hatama kedas golu ba rede ekipa Kablaki Fc ninian iha minutu 15 liuhosi nia jogadór Carol Nascimento hodi lori sira nia ekipa lidera provizóriu iha jogu primeiru parte ne’e.
Tama fali ba jogu segundu parte ninia, ekipa rua muda sira nia estratéjia hodi hakarak aumenta golu no responde golu, iha ne’ebé ekipa Kablaki Fc susesu responde duni golu iha minutu 73, liuhusi jogadór Alito da Cruz hodi score nakfilak ba 1-1.
Maibé liu de’it minutu haat ekipa As Marka hatudu tan sira nia jigante hodi konsege fura tan rede Kablaki Fc ninia ba daruak iha minutu 77, liuhusi jogadór Octaviano Gonçalves, hodi lori hikas sira nia ekipa 2-1.
Nune’e ekipa rua liuhusi sira nia jogadór sira kontinua halo esforsu hodi atake malu liuhusi sira nia orientasaun treinadór ninia maibé la konsege aumenta tan golu ba malu to’o jogu termina ekipa As Marka manan ho rezultadu ikus 2-1 hodi lori sira nia ekipa lidera provizóriu tabela klasifikasaun LFTL segundu divizaun ninia.
570 total views, 3 views today
