DILI (Timor Post)— Atleta Nasionál hosi modalidade atletizmu, Teofilo Freitas, hatudu rekord fantástiku iha Asean Para Games (APG) edisaun 11, ne’ebé realiza iha Solo-Indonézia.
Atleta orijen hosi munisípiu Baukau ne’e konkista medalla osan mean 3, ne’e liu hosi korrida Metru 1500, no korrida metru 800 ho korrida metru 400.
Eventu ne’e hahú iha loron 30 fulan Jullu to’o ohin loron 4 fulan Agostu, kontijente Timor-Leste konkista ona medalla 12 kompostu husi medalla osan mean lima osan mutin rua no osan metan lima.
Timor-Leste partisipa iha eventu Asian Para Games edisaun 11, ne’e ho modalidade hamutuk tolu ho nia atleta hamutuk 15.
Hosi modalidade atletizmu konkista ona medalla hamutuk 5, kompostu hosi medalla osan mean 3 osan mutin 2.
Medalla osan mean 3, ne’e konkista hosi atleta Teofilo Freitas, enkuantu medalla osan mutun 2 ne’e konkista hosi atleta Domingos no atleta Domingas.
Enkuantu hosi modalidade power lifting konsege konkista medalla osan metan ida hosi atleta, José Antonio Aniceto Cerano, ne’ebé kompete husi klase 59-65 .
Alende ne’e hosi modalide Tenis meza konkista ona medalla hamutuk 5 kompostu husi osan mean ida osan mutin rua no osan metan rua.
Ba Timor-Post, Misaun Jonzino da Conceição Fernandes, hatete kontijente Timor-Leste posibilidade sei aumenta tan medalla, tanba sei iha jogu balu husi modalidade atletizmu no mós modalidade tenis meza.
“Ha’u sente kontente no agradese ba ha’u-nia atleta sira no mós ba povu Timor ho Governu SEJD, ne’ebé durante ne’e apoiu komité para limpiku”, nia dehan ba Timor Post, Kinta (04/08).
1,726 total views, 3 views today
