DILI (Timor Post)- Parlamentu Nasionál liuhosi Komisaun B, Levanta asuntu kona-ba kondisaun estrada iha Munisípiu Lautem, liuliu Postu Administrativu Lore ho Iliomar, tanba area ne’e hatudu ambiente turizmu di’ak, maibé realidade kondisaun estrada aat.
“Husi fiskalizasaun ba munisipyiu sira, ha’u deskobre katak estrada liga ho postu Administrativu Lore Ho Iliomar, presiza atu melloria,” dehan Deputada hosi Komidaun B, Elvina Sousa iha Plenária Komisaun Permanente PN, foin lalais.
Tuir Deputada Bankada Partidu Demokrátiku ne’e hatete, iha postu Administrativu hirak ne’e, poténsia na turístiku, iha Munisípiu Lautem, Postu Lore ho Iliomar, dala-barak ko’alia iha Parlamentu Nasional, maibé implementasaun laiha.
Husi Komisaun B Nia fiskalizasaun ba Area Lore ho Iliomar, natureza no paisazen ne’ebé di’ak no iha poténsia turístiku ne’ebé luan, kada tinan iha Kultura ida atu suru ular tasi (Meci).
Nia dehan, paisajen ida ne’e bele kria reseitas públiku, maibé estrada hosi Lospalos ba Lore no Iliomar kondisaun aat liu, tanba ne’e Governu iha devér atu haree hodi bele hadi’ak estrada refere.
Hatan ba preokupasaun ne’e, Ministru ba Asuntu Parlamentares no Komunikasaun Sosiál (MAPKOMS), Francisco Jerónimo, hatete kondisaun estrada hosi Munisípiu Lautem, Lospalos, Postu Administrativu Lore no iliomar, estrada refere sei iha prosesu BoQ (Bill of Quantities).
Nia dehan, estrada Lore no iliomar nian ba prosesu dezenu sei la’o hela, bainhira dezeinu ne’e remata, Projetu bele hahú.
Tanba estrada hosi Lospalos ba Lore no iliomar ne’e diferente ho Munisípiu hirak seluk.
“Ita fiar katak iha tempu badak nia laran Governu sei iha seriedade ba planu hirak ne’ebé hola atu halo, liuliu ba estrada hot-hotu iha teritorial laran tomak,” nia hakotu.
9,871 total views, 3 views today
