DILI-Ró Komponente Navál Xina ho naran “Qi Jiguang” ofisialmente halo vizita dala lima mai Timor-Leste. Objetivu hosi vizita ne’e hodi hametin liu tán kooperasaun bilaterál Timor-Leste no Xina.
Ró Navál Xina ne’e mai Timor-Leste iha kinta (30/5) ohin no atraka iha Portu Dili, iha oras tuku 9:00 dader.
Forsa Navál Xina tún hosi Ró simu hosi Vise Xefe Estadu Maiór Jenerál FALITIL-Forsa Defeza Timor-Leste (F-FDTL), Majór Jenerál Calisto dos Santos “Coli Coliati” no akompaña hosi Embaixadora Xina ba Timor-Leste Wang Wenli, Dirijente hosi Ministériu Defeza no Forsa Komponente Navál F-FDTL.
Ró forsa Navál Xina ne’e lori de’it militár Komponente Navál Xina. Vizita ró komponente Naval Xina ne’e hahú hosi loron 30 Maiu 2024 to’o 3 Juñu 2024.
Hafoin vizita tiha Ró Qi Jiguang Vise Xefe Estadu Maiór Jenerál FALITIL-Forsa Defeza Timor-Leste (F-FDTL), Majór Jenerál Calisto dos Santos “Coli Coliati”, hateten, prezensa Ró marina Xina mai Timor-Leste nu’udar tradisaun militár marina iha mundu atu hametin kooperasaun.
“Vizita ida ne’ebé ita nia parseiru sira hosi Xina mai vizita Timor-Leste ne’e parte ida hosi tradisaun ezérsisiu marina ninian sira iha ne’e hahú ohin to’o dia 3 Juñu. Ida ne’e sinál atu hametin ita-nia kooperasaun entre Xina ho Timor-Leste,” Vise Xefe Estadu Maiór Jenerál FALITIL-Forsa Defeza Timor-Leste (F-FDTL), Majór Jenerál Calisto dos Santos “Coli Coliati”, hateten ba Jornalista sira hafoin vizita ba iha Ró Qi Jiguang iha Portu Dili, kinta ohin.
Majór Jenerál ne’e hateten, durante estadia Ró forsa marina iha Timor-Leste, forsa marina Xina sei halo vizita estudu akadémiku ba Institutu Defeza Nasionál (IDN), sira sei ba vizita Komponenete Naval F-FDTL iha Hera no sei halo mós jogu amizade entre forsa Navál Xina ho Forsa Navál F-FDTL.
“Laiha atividade espesifiku atividade mak ne’e. laiha formasaun, ne’e vizita ne’ebé sira halo mai timór de’it , sira halo vizita ba iha portu sira hanesan Indonézia no iha dalan ne’ebé sira liu ,”nia adianta.
Coliati hateten, ho vizita Ró forsa marina Xina ne’e F-FDTL kompromete kontinua hametin kooperasaun ho Governu Xina liuliu iha área kapasitasaun ba iha oinsá eleva koñesimentu militár F-FDTL sira liuliu ba iha sensia militár nian.
Tanba liuhosi kooperasaun Defeza no militár ne’ebé iha entre Xina no forsa F-FDTL hatudu progresu di’ak tanba militár F-FDTL barak mak hasai estudu iha academia militár iha Xina.
“Ita kontinua hametin kooperasaun ho Xina ne’e sem duvida, tanba liuhosi kooperasaun ho Xina durante ne’e ita nian militár hosi Komponente Navál barak mak halo formasaun iha Xina ate sira propriu rasik mak sai hanesan interpreter ba lian mandarin ba Jenerál sira,” nia afirma.
Entertantu tuir ajenda ne’ebé iha, Komandante ne’ebé lori Ró Navál “Qi Jiguang” sei halo vizita ba entidade nivel altu nasaun nian, Ministru Defeza, Xefe Estadu Maiór Jenerál F-FDTL, Komandante Komponente Navál F-FDTL, IDN, halo vizita ba Estudante no Profesór sira.
1,044 total views, 12 views today
Bele hare Video Seluk :