DILI (Timor Post)-Bee Timor Leste Empreza Públika (BTL E.P) Asina Akordu ho Kompañia GT Internasionál Taiwan iha Timor-Leste (TL), hodi loke dalan ba sira oinsá halo rekursu ba Bee Moos iha Timor-Leste.
“Ita observa rasik katak iha ita-nia nasaun, foho mak barak, nune’e bainhira tempu udan bee barak mak ba hotu tasi, no susar tebes ba ita atu asesu bee iha área rai maran”, dehan Prezidente Konsellu Administrasaun Bee Timor-Leste Emprezáriu Públiku, (BTL E.P), Carlos Peloi dos Reis, iha Edifísiu Ministériu Obras Publika (MOP), Sesta (15/07).
Tuir nia, Timor-Leste dala-ruma bee moos sai difikuldade kona-ba asegurasaun fornesimentu ba komunidade sira bainhira iha tempu bai-loron.
“Tanba ne’e mak ita presiza ema ne’ebé iha matenek no esperiénsia hanesan kompañia GT internasionál husi Taiwan”, nia subliña.
Nia haktuir, reprezentante Kompañia Internasionál husi Taiwan dehan, sira-nia nasaun ho Timor-Leste nia kondisaun jeográfika hanesan.
“Tinan-tinan Taiwan, sempre hetan inundasaun, maibé ladún grave hanesan akontese iha Timor-Leste, tanba ne’e sira iha esperiénsia boot, nune’e ita hakarak loke dalan ba sira liuhusi Memorandum of understanding (MOU)”, nia hateten.
Nia esplika, akordu ida ne’e foin mak hahú ho planu oinsá mak sira bele apoiu Timor-Leste ba oin, liuhusi difikuldade hanesan bee moos, atu akomodasaun di’ak, bainhira inundasaun, atu bele asegura nasaun ho di’ak.
Nia hateten, BTL,EP nia hanoin, oinsá mak hosi Kompañia Internasionál Taiwan, bele ajuda konserva bee hodi prezerva ba udan been, atu bele fó asegurasaun ba mota sira, hodi labele lori inundasaun boot no lori bee ba hotu tasi.
Asina akordu ida ne’e, BTL,EP ho Kompañia Internasionál Taiwan, foin mak hahú halo planu no loke dalan oinsá projeta refere bele ba oin, tanba ne’e parte relevante prepara kondisaun, nune’e prosesu sira ne’e sira mak halo Estudu no mós orsamentu ne’ebé finansia ba Projetu refere sira mak responsabiliza hotu, tanba ne’e planu no Kooperasaun ida di’ak ba Timor-Leste.
Iha parte seluk, Reprezentante husi Kompañia GT Internasionál Taiwan, S.T. Paul. Hsu, hatete sira iha esperiénsia barak, kona-ba oinsá atu haree ba mudansa klimátika, oinsá halo drenajen ba udan, atu labele implika fali ba kondisaun tasi nian, hanesan iha Timor-Leste.
“Planu sira ne’e mak ami mai asina akordu ida ne’e ho BTL E.P, atu haree ne’e ba oin, no fiar katak planu sira ne’e sei la’o ba oin nafatin”, nia promete.
Servisu ida ne’e parte BTL E.P, mak fó autorizasaun, oinsá servisu ne’e ba oin, nune’e fiar katak sira sei halo buat ne’e di’ak ba Timor-Leste iha futuru.
2,179 total views, 3 views today
