DILI (timorpost.com)–Ministériu Edukasaun (ME) hala’o enkontru ho embaixadora Portugal iha Timor-Leste, Maria Manuela Vairos diskute projetu rua ba kooperasaun apoiu fasilitasaun formasaun no projetu konstrusaun eskola kafé.
“Ohin ko’alia asuntu rua mak hanesan ida, apoiu fasilitasaun formasaun no ida seluk maka projetu konstrusaun eskola kafé inklui apoiu seluk”. Haktuir Ministra Edukasaun (ME), Dulce de Jesus Soares, ba jornalista sira iha Vila-Verde, Segunda (18/09).
Ministra haktuir, espansaun ba konstrusaun eskola kafé ne’e bazeia ba proposta ne’ebé mak hakerek ona iha planu IX Governu konstitusionál.
“Ita liga ba lian, lingua portugés sai hanesan lingua ofisial ne’ebé deskreve ona iha konstituisaun Timor-Leste, tanba ne’e manorin inklui estudante sira hotu iha obrigasaun atu aprende portugés, ko’alia portugés atu reforsa apoiu sira ne’ebé iha tiha ona hanesan eskola kafé”. Ministra Dulce dehan.
Iha soru mutu ne’e, ami mós diskute uitoan kona ba, iha ano letivu foun, posibilidade atu aumenta tan Professor husi númeru 130 aumenta ba 150 no mós hare fila-fali oinsá mak iha projetu por portugés bele halo di’ak liu tan.
Ministériu Edukasaun mós iha estratéjiku polítika ME nian iha planu atu loke formasaun ba profesór 2 mil pesoa, ne’ebé mak tinan-tinan pasa no sira tenke kontinua aprende lingua portugés husi formasaun ne’ebé mak prepara husi ME.
690 total views, 15 views today
