DILI (timorpost.co)—Estudante foun Universidade da Paz (UNPAZ) tinan 2023, hamutuk na’in-3448, ohin Kinta (02/03/2023), hahú ona orientasaun.
Serimónia abertura orientasaun ba estudante foun tinan ne’e abertura hosi Magnifiku Reitór Universidade da Paz, Adolmando Amaral, hamutuk ho nia estrutura no Fundasaun UNPAZ tomak, iha Salaun Universidade da Paz, Kinta (02/03).
Iha abertura ne’e nia dehan, orientasaun agora ne’e la hanesan ho tinan uluk sira ne’e, hanesan estudante tuan sira halo estudante foun sira toba iha tahu laran no haruka dansa, maibé agora ne’e laiha ona.
“Orientasaun tinan ida ne’e la hanesan ona ho tinan uluk estudante Pre-Sekundária no Sekundária sira halo ne’e, maibé orientasaun Akadémika UNPAZ hahú kedas iha tinan 2020, katak, la halo ona kandidatu estudante sira atu sai hanesan ema bulak”, dehan Adolmando Amaral, liuhosi nia diskursu hafoin halo abertura ba Orientasaun.
Nia dehan, tanba orientasaun ne’e atu lori estudante foun sira ba koñese Biblioteka mak ida ne’ebé, laboratóriu mak ida ne’ebé no prosesu aprendizajen iha ida ne’ebé.
“Entaun buat sira ne’ebé mak ha’u temi ne’e mak Universidade da Paz aplika iha ninia orientasaun tinan ida ne’e, ne’ebé laiha ona ita boot sira mai ho fuuk rebo-rebo tau kaleen no surat tahan oin-oin ne’e karik akontese iha eskola seluk, maibé UNPAZ laiha ona ida ne’e”, Nia deklara.
Nia subliña, tanba ne’e estudante foun sira labele ta’uk, tanba orientasaun sira uluk halo estudante sira foun atu sai bulak ne’e laiha ona Universidade da Paz, karik iha Universidade sira seluk mak sei iha.
Enkuantu orientasaun estudante foun UNPAZ ba períodu 2023 ne’e realiza durante semana ida hahú hosi loron 02 ba to’o iha loron 09 fulan Marsu tinan ne’e.
1,264 total views, 34 views today
