BAUKAU (Timorpost.com)-Servisu Munisipál Edukasaun Juventude no Desportu (SMEJD) ba ano letivu 2023 hetan Programa Konstrusaun no Reabilitasaun Infraestrutura Edukativa (PKRIE) hamutuk eskola 14.
Diretór SMEJD Baukau, Augusto O. Ximenes, hatete, Ministériu Edukasaun Juventude no Desportu (MEJD) iha tinan 2023, implementa tan ona Programa Konstrusaun no Reabilitasaun Infraestrutura Edukativa hamutuk 14 iha munisípiu Baukau.
Nia esplika, iha tinan 2023 ministériu aprova dudu liuhusi projetu komunitariu hanesan tinan kotuk Baukau hetan 29 projetu agora hetan 14, barak liu postu administrativu Kelikai, tanba ne’e hetan projetu neen, enkuantu postu seluk balun ida, rua to’o tolu.
“Tinan ida ne’e ita Baukau hetan PKRIE 14, 13 ita forma ona grupu komunitariu no uza ona orientasaun katak fulan Abríl tenke halo ona lansamentu, entre projetu 14 postu administrativu Kelikai hetan neen”, Augusto hateten ba Timor Post Kinta feira (23/02/2023) iha CCB Vila Antiga.
Nia afirma, entre projetu 14 ne’ebé atu hala’o iha tinan ida ne’e ho nia medida sala tolu to’o sala neen, projetu 14 ne’e sei inklui mós eskola públiku no mós eskola katólika.
Atuál diretór ne’e haktuir’ maski ministériu fó tan ona projetu 14 ba munisípiu Baukau, maibé seidauk bele responde nesesidade infraestruturál ba eskola sira iha territóriu munisípiu Baukau .
“Lista prioridade kada tinan ita hasae proposta rua nulu resin, maibé mai mak ba eskola lima ka neen, ne’e signifika ita sei presiza barak tanba dala barak ita nia inan aman uza baze fó sala mai diretór edukasaun munisípiu mais la’o ha’u mak kaer osan”, nia dehan.
Tuir informasaun eskola iha territóriu Baukau laran tantu eskola públiku no katolik hamutuk 243 kompostu husi pre-eskolár to ensinu sekundáriu jerál no tékniku vokasionál.
1,791 total views, 3 views today
Bele hare Video Seluk :