Dili (timorpost.com) — Ministra Saúde, Odete Maria Freitas Belo, alerta ba públiku liuliu inan-aman sira atu kuidadu oan, tanba risku hosi moras sarampu ba labarik sira as tebes.
Nia hatete, sarampu nu’udár moras ida ne’ebé afeta ba labarik sira ho isin kanek, maibé mós bele afeta pulmaun, matan, ikus mai bele halakon labarik nia vida.
“Ha’u-nia apelu ba iha komunidade, liuliu ba inan sira ne’ebé iha oan husi tinan lima mai kraik, favor ida lori imi-nia oan mai simu vasina,” nia hateten hafoin partisipa reuniaun avaliasaun servisu Komisaun Nasionál Immunization technical Advisory Group Timor-Leste (NITAG-TL) iha Hotel Timor, Sesta (06/01).
Nia dehan, vasina ne’e objetivu atu halo forte nafatin labarik sira nia imunidade, tanba Sarampu la’ós ataka musan-musan iha isin de’it, más afeta mós ba labarik sira-nia pulmaun, mear, dada iis, bele mate iha tempu ne’ebá, no afeta mós ba labarik sira nia matan bele at.
Tanba ne’e, nia husu ba komunidade tenke lori labarik idade tinan lima mai kraik hakbesik an ba fasilidade saúde sira hodi simu vasina Polio.
“Vasina polio ne’e mós hanesan ita fó ba atu nune’e prevene sarampu, tanba ita lakohi ita-nia oan sira sai defisiente iha tempu tuir mai”, nia hateten.
Alende ne’e Ministra mós relata, iha dadus tinan 2022, kazu sarampu ne’e rejista iha 9, maibé iha tinan 2023 ne’e rejista kazu ida ka rua iha Munisípiu Kovalima, entaun presiza atu prevene ida ne’e maka tenke halo vasina Polio ba labarik sira iha tinan ida ne’e.
“Sarampu ne’e ha’u hanoin iha 2023 ne’e ita iha kazu, ho razaun ita hetan kazu ida ka rua iha Suai, ne’e mak ita atu implementa vasina polio ba labarik sira ne’e”, nia esplika.
Ikus nia subliña, Ministériu Saúde sei servisu hamutuk ho organizasaun mundiál saúde no NITAG-TL, atu halo kompañia nasionál ba labarik sira tinan lima mai kraik bele hetan vasina polio.
2,503 total views, 3 views today
Bele hare Video Seluk :
Subscribe to Timorpost
