DILI–Ministru Finansas, Rui Gomes reprezenta Governu Timor-Leste no Diretorik Ajénsia Kooperasaun Internasionál Koreia du Súl, Eunju Cha, sei asina akordu subvensaun públiku (Grant) ho valór $6 milhões.
Kontribuisaun finanseira husi KOICA ne’e sei uza hodi finansia Projetu Fortalesimentu Preparasaun no Resposta ba Moras Infesioza sira iha Timor-Leste.
Tuir akordu ne’ebé Ministru Finansas, Rui Gomes, asina ho KOICA, Ajénsia Kooperasaun Internasionál Koreia du Súl komprometidu atu fórnese kontribuisaun finanseira $6 milhões ne’ebé sei uza atu fortalese preparasaun no resposta ba moras infesioza (moras ne’ebé hadaet lailais) sira iha Timor-Leste, liuhusi reforsu kapasidade atu deteta, notifika no respode iha kualker nível, tuir tempu ne’ebé loloos ba surtu moras infesioza prioritária sira, inklui mós preparasaun espesialista nasionál sira ba área ne’e.
Husi Novembru 2020 até Fevereiru 2023, Oitavu Governu Konstitusionál mobiliza ona subvensaun públiku (Grant) ho totál $623,8 milhões. Husi montante ne’e, KOICA kontribui ona $25 milhões ne’ebé kompostu husi $5 milhões ba Projetu Dijitalizasaun Chega; $7,8 milhões ba Projetu “Say No To 5S”; $6,2 milhões ba Projetu “YEES” no adisionál $6 milhões ba Projetu Fortalesimentu Preparasaun no Resposta ba Moras Infesioza sira iha Timor-Leste.
Kontribuisaun finanseira adisionál $6 milhões ne’e nu’udar provas konfiansa husi Parseirus Dezenvolvimentu hanesan KOICA mai Oitavu Governu Konstitusionál lideradu husi Primeiru-Ministru, Jenerál Taur Matan Ruak.
Orsamentu ho totál $623,8 milhões (inklui ona $420 milhões husi MCC), Governu uza hodi finansia investimentu estratéjiku hanesan konektividade transporte (Estradas, Pontes no Aeroportu), investe iha kapitál umanu hodi mellora produtividade laborál (Saúde, Edukasaun, Protesaun Sosiál, Bee Mo’os no Saneamentu, Abilidade Empregu no Empreendedorismu ba Foin-sa’e sira) inklui Enerjia Eletrisidade.(jho)
2,332 total views, 9 views today
Bele hare Video Seluk :
Subscribe to Timorpost
