DILI (Timorpost.com) – Universidade Nasionál Timor Lorosa’e (UNTL), horisehik (05/01), haruka ona lista estudante foun akadémika 2023, ba Ministériu Ensinu Superior, Siénsia no Kultura (MESSK), liuhosi Komisaun Asesu Ensinu Superior (KAES).
“Ami finaliza ona teste ba estudante foun, horisehik haruka ona ba Ministériu Ensinu Superior, bainhira atu anúnsiu ne’e kompeténsia sira nian”, hatete Vise-Reitór Asuntu Akadémika no Garantia Kualidade, Samuel Venâncio Freitas, ba Timor Post Online iha knaar fatin Kaikoli, Sesta (6/01).
Nia afirma, horisehik Konsellu Jerál aprova ona dadus estudante foun ba Ministériu Ensinu Superior, Siénsia no Kultura (MESSK), hein rezultadu bainhira atu anúnsiu.
Vise-reitór ne’e informa, tuir kalendáriu estudante foun sei hahú aula iha Marsu, sei deklara sedu tiha, anúnsiu bele akontese iha Fevereiru tinan ida ne’e.
“Maibé ha’u fiar katak sei anúnsiu iha Janeiru, depois sira rejistu fakuldade iha Fevereiru tanba sira hahú eskola Marsu nia laran”, nia hateten.
Portantu total estudante ne’ebé tama iha lista hamutuk 3.720, hosi Fakuldade sia hanesan Agrikultura, siénsia exata, siénsia sosiais, direitu, ekonomia no jestaun, edukasaun arte no umanitáriu, enjenária siénsia no teknolójia, filozofia siénsia umana, no medisina siénsia saúde.
7,020 total views, 3 views today
