DILI (Timor Post)—Komemorasaun Loron FALINTIL-Forsa Defeza Timor-Leste (F-FDTL), ba dala 47, membru F-FDTL na’in-40 voluntáriu halo doasaun raan ba iha Banku de Sangue, hodi tulun pasiente ne’ebé presiza ran emerjénsia iha Hospital Nasionál Guido Valadares (HNGV).
Tuir Inspetora Jerál Ministériu Defeza, Josefa dos Reis Gonçalves, hatete membru F-FDTL hamutuk na’in-40 mak sei halo solidariedade oferese sira-nia ran ho gratuita ba iha banku de Sangue hodi tulun pasiente sira ne’ebé presiza ran.
“Atividade doasaun raan ne’e ho voluntariamente ita-nia membru F-FDTL sira mak oferese ba iha banku de sangue atu tulun pasiente sira ne’ebé baixa iha Hospital presiza raan atu salva sira-nia vida,” nia hateten iha Salaun Auditóriu F-FDTL Fatu-hada, Tersa (02/08).
Tanba ne’e, mak atividade doasaun raan ne’e sei hahú iha loron 02 to’o 08 Agostu iha instituisaun F-FDTL, hodi komemora loron Falintil 20 Agostu ba da-47 ho tema Sentrál “Os Valor das Falintil no Processo Construção Nacional”.
Iha fatin hanesan Xefe Departamentu Banku de Sangue, Januário da Kruz Freitas, hatete atividade doasaun raan ne’e hala’o, tanba banku de sangue halo kolaborasaun ho instituisaun F-FDTL atu komemora loron Falintil iha loron 20 fulan Agostu ba da-47, tanba ne’e sira hakarak fó mós solidariedade sira-nia raan atu tulun pasiente sira ne’ebé moras presiza raan.
“Tuir loloos atividade doasaun raan ne’e hala’o iha loron 11 fulan Agostu, maibé atividade barak mak F-FDTL sei hala’o molok tama ba iha komemorasaun loron Falintil nian, tanba sira husu hahú 02 to’o 08 Agostu, apoiu ba ita atu salva pasiente sira ne’ebé presiza raan,” dehan nia.
Alende ne’e kona-ba stock ran iha banku de sangue daudaun ne’e raan sei iha 147 pakote, ida ne’e sei responde ba kazu pasiente ne’ebé presiza ho urjente.
Tanba ne’e tipu raan hotu hanesan A, B ho O ne’e iha banku de sangue presiza hotu, dala-ruma raan ne’e iha pasiente sira laiha atu uza no raan laiha tiha pasiente iha dala-ruma presiza urjente ida ne’e mak baibain akontese iha Bandu de Sangue.
“Ita husu ba sidadaun hotu se de’it bele ho voluntáriu oferese ita-nia raan atu salva maluk sira ne’ebé moras baixa iha hospital sira, tanba raan sira ne’e ita apoiu ba iha HNGV, RAEOA, Hospital Referral Maubesi no Bobonaru, ida ne’ebé durante ne’e ita apoiu raan atu salva pasiente sira,” hakotu nia.
Molok ne’e Portavós FALINTIL-Forsa Defeza Timor-Leste (F-FDTL), Kapitaun Enjeñaria, José António Nunes da Costa, hatete atu komemora loron FALINTIL ba dala haatnulu-resin (47) ne’e membru no estrutura militár sei halo doasaun raan ba iha Hospital Nasionál Guido Valadares (HNGV).
1,856 total views, 3 views today
Bele hare Video Seluk :
Subscribe to Timorpost
