Dili(timorpost.com)—Koordenadór Jerál ekipa susesu Partidu Libertasaun Populár (PLP), António Freitas, dehan sira la prepara karreta hodi tula eleitores sira atu ba vota iha munisípiu sira.
Deklarasaun ne’e nia hato’o ba Timor Post, via telefone Sesta (19/05/2023), dadeer ne’e hafoin konfirma kona-ba asuntu refere, tanba haree ba partidu barak aluga karreta hodi tula nia eleitores sira ba vota iha foho.
“Ami la prepara karreta ida atu tula ema ba munisípiu hodi tuir votasaun, tanba ida ne’e la’ós ami nia kompeténsia, maski partidu sira seluk halo, maibé ami la halo ida ne’e”, dehan António Freitas, via telefone, Sesta (19/05) ne’e.
Tuir nia, tanba períodu kampaña nia remata ona entaun sira nia parte kumpre nafatin regulamentu órgaun eleitorál nia, tanba liu prosesu ida ne’e ema dehan fraude eleitorál, tanba ne’e PLP la halo.
“Ho ida ne’e partidu la fasilita ema ida ka aluga karreta hodi tula sira ba munisípiu atu tuir votasaun ne’e, tanba ne’e PLP nia desizaun firme”, nia deklara.
Klaru iha duni loron horisehik PLP hamutuk ho KHUNTO aluga kamioneta ida ou rua hodi tula balun ba foho, tanba sei iha períodu kampaña nia laran.
“Klaru horisehik ne’e sei iha períodu kampaña no horisehik mak foin remata, entaun ohin aban ami sei la fasilita tan karreta hodi tula tanba períodu kampaña liu ona, kuandu ita halo nafatin ema dehan fraude eleitorál”, nia hakotu.
1,683 total views, 3 views today
Bele hare Video Seluk :
Subscribe to Timorpost
