DILI–Prezidente Partidu Congreso Nacionál de Reconstrução de Timorense (CNRT), Kay Rala Xanana Gusmão, konsidera Oitavu Governu foin lalais ne’e halo lei ida hodi haruka ba Prezidente Repúblika atu bele promulga osan hamutuk millaun 70 USD para implementa programa sesta bázika ba segundu etapa.
“Foin lalais halo governu ida ne’e halo lei ida ba prezidente husu atu promulga osan milliaun 70 hodi halo sesta bazika, no sira promote sei hasa’e osan sesta bazika kada uma sei simu $1000. ida ne’e nia objetivu atu buka votus, sorte Prezidente Horta iha ne’eba, se Lú-Olo maka iha ne’eba ne’e nia promulga tiha ona,” dehan Xanana iha konsolidasaun partidu CNRT ne’ebé hala’o iha Otel Arbiru Bebonuk, s’Sesta (31/03).
Xanana dehan, iha lei Governu nian ne’e, promete sei hasa’e osan sesta bázika fahe ba uma kain ida sei hetan osan 1000 USD ho objetivu atu buka votu iha Eleisaun Parlamentár agora.
Tuir Eis Primeiru Ministru ne’e katak, bainhira Prezidente Repúblika anunsia ona kalendáriu eleisaun parlamentar, signifika governu ne’e labele halo ona programa. Tuir lei bainhira governu ida atu hasai osan hosi fundu minarai tenki hetan aseitasaun hosi Parlamentu Nasionál no governu ne’e la respeita lei hodi sobu sistema finanseiru estadu sai aat liután.
“Sistema ida iha governu importante liu maka finanas, maibe governu ida ne’e estraga tiha sistema ne’e,tanba gasta osan arbiru de’it no la iha kontrolu,” nia lamenta.
Xanana promote, bainhira CNRT kaer ukun agora, CNRT sei husu loke investigasaun ba idividu governu atuál ne’ebé komete iha krime korrupsaun.
Komandante Em-Xefe -das FALINTIL ne’e halo komparasaun governu AMP ne’ebé nia lidera iha tinan 10 kaer ukun gasta billiaun 9,7 USD enkunadu governu atuál lideradu Primeiru Ministru (PM), Taur Matan Ruak tinan lima gasta billiaun 10 USD, maibé rezultadu zero.
Nia hatutan, CNRT kria tiha ona Planu Estratéjiku Dezenvolvimentu Nasionál (PEDN 2011-2030) ne’ebé iha programa balun implementa ona hanesan, eletrisidade, hadia estrada nasionál no munisipiu nian balun, hadia jestaun administrasaun estadu, harii infraestrutura eskola, saúde no seluktan.
“2012 too 2017 konsege halo buat ituan balun, no too tinan 2017 mai ne’e buat balun la’o paradu tiha, tanba ne’e ba tinan 2023 CNRT tenki hetan maioria kadeira 33 iha Parlamentu Nasionál para CNRT bele forma governu ho di’ak hodi aprezenta programa ho di’ak,” nia hatete.
Tuir Xanana programa PEDN agora paradu, tanba bainhira kria governu kria programa PEDN, FRETILIN rasik vota kontra, tanba ne’e maka sira kaer ukun sira la iha hanoin atu dezenvolve planu PEDN, tanba ne’e maka ha’u fó naran ba governu ida ne’e yang peting nia ema sai membru governu, maibé la hatene atu halo saida,” dehan Xanana.
Juventude PLP-FRETILIN Na’in-50 Tama CNRT
Iha oportunidade ne’e, Xanana simu mós juventude partidu FRETILIN no PLP kuaze ema na’in-50 deklara fó fiar ba CNRT, tanba CNRT iha programa di’ak atu hadia povu nia moris no hala’o dezenvolvimentu infraestrutura no hadia ekonomia nasaun Timor-Leste.
Juventudu hirak ne’e husu Xanana bainhira kaer ukun kria kampu servisu ba ema tomak, tanba governu ida ne’e haruka traballador ba servisu iha Austrália no Koreia do Sùl tenki halo fali juramentu ba partidu politiku KHUNTU no sai membru FRETILIN no PLP.
Ba asuntu ne’e, Xanana rekoñese asuntu servisu ba joven prioridade ba Partidu CNRT iha nia programa hodi kria fundus espesiál fó bolsu estudu ba foin-sa’e sirabba eskola liu Instituisaun Estadu Fundu Dezenvolvimentu Capital Umana (FDCH) no programa seluk tan.(jho)
4,943 total views, 3 views today
Bele hare Video Seluk :
Subscribe to Timorpost
