LAUTEM-Prezidente Partidu Kongresu Nasional Rekonstrusaun Timorense (CNRT sigla portuges), Kay Rala Xanana Gusmao, promete ba eroi sira katak, bainhira sai Primeiru Ministru sei tau matan ba ferik no katuas sira.
Xanana hato’o kompromisiu politiku ne’e, iha komisiu aberta partidu CNRT nian, ne’ebe realiza iha kampu Futebol Eis Asrama 745 Puihoro, Tersa (25/04).
Xanana hatete, Timor-Leste hetan ukun an husi sira ne’ebe mate no ferik katuas sira ne’ebe mak sei moris, tanba ne’e katuas ho ferik sira ne’e mak eroi.
Estadu tenke kumpri obrigasaun boot tebetebes ida ba ferik no katuas sira, tanba sira mak liberta nasaun ne’e.
“Tanba ne’e karik ha’u ba fali Primeiru Ministru, ha’u promete ba eroi sira, Estadu tenke kumpre nia obrigasaun ba imi ferik no katuas sira”, Xanana promete.
Xanana dehan, nia universidade funu hahu husi Lospalos Mehara, fatuk kuak ida naran Oi, ne’e duni nia (Xanana) sei iha deve ba rai ida Lospalos, tanba aprende gerilla hamutuk ho populasaun rai Lospalos hodi liberta rai ida ne’e, ne’ebe mak ohin loron Estadu Diretu Demokratiku atu monu.
“Ha’u la presiza atu sai Primeiru Ministru, mais tanba Estadu Diretu Demokratiku husu responsabilidade ida ne’e, nu’udar timoroan ha’u sei simu responsabilidade ida ne’e, hodi salva tiha Estadu Diretu Demokratiku ida ne’e”, Xanana afirma.
Xanana hatete, iha tinan 10 partidu CNRT ka’er ukun gasta billiaun 10, maibe governu ai-tonka iha tinan lima gasta billiaun 11, mais relatoriu laiha, ida ne’e mak Estadu atu monu.
CNRT iha 2011 aprezenta planu estratejiku atu dezenvolve rai ne’e, maibe para tiha iha 2017 to agora, tanba ne’e bainhira CNRT fila ba ukun sei kontinua no hahu desentralizasaun.
Entretantu, maski kampana aberta ne’e iha ambiente udan, maibe militante CNRT mantein hakonu fatin kampana, hodi rona kompromisiu politiku husi partidu CNRT.
Nune’e mos marka prezensa husi partidu aliadu no movimentu sira, inklui hetan observasaun direta husi orgaun eleitoral Komisaun Nasional Eleisaun (CNE sigla portuges), no mos hetan seguransa masimu husi Polisia Nasional Timor-Leste komandu munisipiu Lautem.
8,891 total views, 3 views today
