DILI, (Timorpost.com)—Iha Prosesu Primeira Interrogatóriu liuhusi alegasaun final Ministériu Públiku, husu tribunal Judisiária Primeira Instánsia Dili (TJPDL), atu aplika media koasaun Prizaun preventiva (PP) ba arguidu Nain-7, ne’ebé deskonfia involve iha kazu na’ok telefone.
Defeza ba arguidu sira, advogadu privadu, Ismael Assunção, hatete, Prosesu primeiru Interrogatóriu ne’e, tribunal konsege rona arguidu sira deklarasaun hotu, liga ho kazu na’ok telefone hodi rezulta vítima Nituchia Frangidae lakon vida no nia inan Juliana Elizabeth F Soares kondisaun kanek grave.
“Maibé, iha prosesu Primeiru Interrogatóriu ne’e, seidauk iha desizaun ruma ba kazu ne’e, mais iha alegasaun, Ministériu Públiku liuhusi prokuradór Reinato Berenahak husu ba tribunal atu aplika medida koasaun Prizaun preventiva ba ha’u nia kliente sira, maibé husi ami parte defeza husu ba tribunal atu aplika media koasaun aprezentasaun Periódika, tanba foin iha faze rekolla indisiu, bainhira iha faze investigasaun hafoin ita hatene krime loloos, maka ita aplika medida saida,” dehan Defeza ba arguidu sira, advogadu privadu, Ismael Assunção ba Timor Post, Domingu (26/05).
Tuir defeza ne’e, Ministériu Públiku razaun husu prizaun preventiva, tanba na’ok telefone hodi rezulta vítima Nituchia Frangidae lakon vida no nia inan Juliana Elizabeth F Soares kondisaun kanek grave.
“Ministériu Públiku promove krime rua ba ha’u nia kliente sira, krime robou ho omesidiu simples,” dehan defeza.
Hafoin rona tiha parte hirak, tribunal Judisiál Primeira Instánsia Dili, liu-husi juis turnu Afonso Carmona deside hadi’a hikas prosesu ba iha loron 27 fulan Maiu tinan 2024, iha oras 11:00 dadersan hodi submete ba desizaun.
Iha audiénsia Primeiru interrogatóriu ne’e, Prezide husi Juiz turnu Afonso Carmona, Ministeriu Publiku reprezenta husi prokuradór Reinato Berenahak, arguidu sira hetan asistente legal husi Advogadu privadu, Ismael Assunção no Arnaldo da Costa Lopes.
795 total views, 9 views today
Bele hare Video Seluk :
Subscribe to Timorpost
