DILI, (timorpost.com)— Xefe Estadu Maiór Jenerál F-FDTL, Tenente Jenerál, Falur Rate Raek, konfia kapasidade forsa armada hodi hala’o kna’ar ho efetivu, maske hasoru dezafiu oioin maibé kontinua firme.
“Nu’udar Xefe Estadu Maiór Jenerál Forsa Armada, ha’u iha konfiansa ba ita-nia Forsa Armada nia kapasidade atu hala’o sira-nia kna’ar ho efetivu. Ha’u akompaña progresu servisu husi F-FDTL no laiha dúvida katak sira iha dalan ne’ebé loos atu serví ita-nia povu. Iha kapasidade úniku ne’ebé F-FDTL bele apoia autoridade sivíl, liuliu iha ita-nia esforsu ba dezenvolvimentu hanesan nasaun ida, uluk nanain, ita tenke kontinua hametin ita-nia mekanizmu kontrolu tasi no matan moris nafatin hasoru ameasa sira ne’ebé bele afeta ita-nia nasaun no ita-nia povu nia pás no estabilidade”, dehan Falur Rate Laek, liuhosi nia diskursu iha ámbintu selebrasaun aniversáriu transformasun Falintil ba F-FDTL ba dala-23 iha Kuarte Jenerál F-FDTL, Fatuhada, Sesta, (02/02).
Jenerál ne’e hatete, forsa armada labele falla atu proteje sira nia-an hasoru ameasa ne’ebé aas konvensial hanesan define ona iha konseitu estratéjiku militár. Tanta ne’e asegura koondenasaun no preparasaun ne’ebé efetivu entre ajensia militár no sivíl sira ne’ebé ezekuta lei hasoru kualkér asaun ne’ebé bele afeta ita-nia pás, seguransa no estabilidade.
“Ita-nia militár lori ita-nia bandeira ho orgullu iha rejiaun sira ne’ebé hasoru problema iha Repúblika Sudaun Sul. Ita kontinua buka oportunidade atu asegura katak ita-nia forsa armada hatán ba misaun sira ne’ebé konstituisionalmente no legalmente define ona, atu nune’e bele hasa’e ita-nia instituisaun nia perfil no prestijiu nu’udar forsa ba pás no konfiansa”, nia hatete.
Forsa armada mós involve ona dezenvolvimentu infraestrutura sira hodi apoiu populasaun, buka tu hadi’a kondisaun báziku moris, servisu apoiu komponente no unidade sira, tanba forsa armada iha oportunidade oioin no esforsu ba dezenvolvimentu infraestrutura bazeia ba pedidu husi komunidade.
“Tinan oin (2025) ita komemora tinan lima-nulu (50) ezisténsia FALINTIL nian no tinan rua-nulu-resin-haat (24) ezisténsia F-FDTL nian. Ita botu presiza halo reflesaun kona-ba Estadu atuál forsa armada nian. Ba ha’u laiha duvida kona-ba modernizasaun no profisionalizasaun iha F-FDTL, no labele demora see iha konsensu iha ita-nia poder polítiku no alta entidade sira. See ita-boot sira konkorda, ha’u husu ita hotu atu servisu komesa ohin”, nia dehan.
Nia hatutan, “Nune’e mós, bainhira ita haka’as-an atu responde nesesidade lojístika husi forsa armada, ita mós haka’as-an atu responde ba ita-nia nesesidade formasaun hodi kria kondisaun ba iha Sentru Formasaun Komandante Nicolau Lobato iha Metinaro”.
Jenerál ne’e husu forsa armada haka’as-an nafatin firme atu kumpri kna’ar hirak ne’ebé simu, maske ho dezafiu barak, inklui falta meius ba misaun operasionál, alojamentu ne’ebé la adekundu, defisiénsia iha sistema saúde militár no in-efisiénsia iha modernizasaun sistema informasaun no teknolojia.(*)
1,823 total views, 3 views today
Bele hare Video Seluk :
Subscribe to Timorpost
