DILI (timorpost.com) – Polisia Nasionál Timor-Leste (PNTL) liuhosi Komandu Eskuadra Dom Aleixo hamutuk ho Servisu Sekreta Makikit asegura suspeitu ho naran inisiál DCM tanba taa vítima L nu’udar oan rasik.
Komandu PNTL Eskuadra Dom Aleixo hamutuk ho Servisu Sekreta Makikit hosi PNTL munisípiu Dili, asegura suspeitu DCM, tanba uza katana hodi taa vítima L ne’ebé hanesan mós nia oan mane rasik.
Akontesimentu ne’e iha area Cacaulidun, suku Bairru Pité, postu administrativu Dom Aleixo, munisípiu Dili, iha loron Sesta (09/06), maizoumenus tuku 04:00 OTL dadeer madrogada.
Kazu ne’e akontese bainhira suspeitu nu’udar aman fila hosi servisu fatin ba nia uma, hatete ba nia oan L ne’ebé loke televizaun hodi akompaña joga bola no dehan ba nia oan katak “agora ita nia bairru prepara-an atu simu vizita Santo Antonio, ema mai bolu ba kesi arku o ba netik labele hein ha’u tanba imi boot ona,” DCM dehan ba nia oan.
Derrepente nia oan mane L simu hasoru hodi responde ba nia aman katak “Pai lanu nonook tiha”.
Rona liafuan ida ne’e, nia aman la satisfás no sente soke, tanba la espera nia oan rasik atu ko’alia hasoru ho liafuan ida ne’e, entaun ho emosaun ne’ebé nakonu los ona nia aman foti katana taa nia oan mane hodi rezulta liman sikun kanek.
Hafoin hetan kontaktu hosi servisu sekreta, ekipa patrulla Eskuadra PNTL Dom Aleixo ba to’o kedas iha fatin akontesimentu hodi asegura suspeitu ho evidénsia no lori kedas suspeitu ba halo identifikasaun iha Eskuadra PNTL Dom Aleixo Comoro.
1,380 total views, 3 views today
Bele hare Video Seluk :
Subscribe to Timorpost
