DILI (timorpost.com) — Hafoin akontese kalamidade iha loron 04 fulan Abríl 2021, ne’ebé rezulta ema hotu-hotu sai vítima, halo komunidade sira sente ta’uk bainhira besik fali tempu udan.
Xefe São José Operáriu Bairru Sagradu Korasaun de Jesus Ai-tarak Laran, Duarte Sarmento, hatete area ne’e kuandu tempu udan ona entaun komunidade afetadu duni, lalika dehan ameasa hosi mota, tanba iha ne’e bee dalan de’it laiha.
“Ami hanoin kona loron 04 fulan Abríl ne’e ami trauma tiha ona no agora besik tempu udan tan, tanba iha nakukun ne’e ita la hatene mota mai husi leten, ne’ebé ita lalika hein atu udan,” nia dehan ba Timor Post Online iha nia hela fatin Ai-tarak Laran, Domingu (16/10).
Nia dehan, bairru tasi-ibun ida ne’e, daudauk ne’e hanesan atu hato’o de’it, tanba agora tempu udan mai daudauk ona, iha ne’e mós labarik sira barak bee hotu-hotu mai tampung iha ne’e, bee dalan husi parte Bairru-Pité, Fatuhada mós mai, hotu iha ne’e.
Nia konta, akontese kalamidade iha loron 04 fulan Abríl, komunidade sira iha Ai-tarak laran halai hotu ba edifísiu Ministériu Finansas, hodi salva sira-nia moris, tanba bee nalihun iha uma laran, kuaze metru 1.50. Iha momentu inundasaun ne’e, bee tama ba uma laran, sira-nia sasán balu la aproveita.
“Iha momentu ne’ebá laiha ema ida atu mai bolu no ha’u rasik kontrola husi tasi ibun mai to’o parte Ministériu Finansas nia kotuk ne’e, entaun ami na’in hira sa’e ba iha ne’ebá hasoru seguransa no sorte Ministériu Finansas mós fó tempu no telefone ba Xefe Gabinete, nune’e autoriza ami tama,” nia relata.
Tanba ida ne’e mak atu hato’o de’it, karik Estadu ou Governu iha oportunidade ruma karik bele tau atensaun mós ba komunidade hirak ne’e.
“Iha komunidade mak iha Governu no Estadu, sei laiha komunidade sei laiha Governu no Estadu. Ha’u lori Bairru ida ne’e atu hato’o de’it ba estadu ou Governu sira ne’ebé tutela ba iha Obras Públika, karik sira iha mákina boot ruma bele tau atensaun hela ba ami tanba Bairru ne’e sempre hasoru risku,” nia sujere.
Nia informa, iha parte tasi ibun ne’e, konta loloos de’it ba uma permanente kuaze atus 5, se konta ho agora besik atus 7, mais konta ho koos entaun besik rihun 1.
Ikus nia aprezenta, komunidade ne’ebé konsentra iha fatin ida ne’e husi Munisípiu oi-oin inklui Rejiaun Administrativu Espesiál Oe-kuse Ambenu (RAEOA), tanba vida moris no orsamentu estadu halo sentraliza iha Dili de’it la fó oportunidade ba iha Munisípiu sira.
2,167 total views, 3 views today
Bele hare Video Seluk :
Subscribe to Timorpost
