(Reportajen Olga Soares/Editor Isabel Ermelita)
DILI (Timor Post)– Dezde dadersan hahú loke, Sentru Votasaun iha Eskola Sekundáriu Jerál 10 Dezembru ema ladun barak mai tuir votasaun, kompara ho elisaun primeiru volta ne’ebé eleitór barak loos.
Tuir observasaun ne’ebé Timor Post halo iha tereñu, nota katak too tuku 10:00 mós ema ladun iha iha sentru votasaun refere.
La’os deit iha Sentru Votasaun eskola 10 Dezembru, situasuan hanesan akontese mós iha Sentru Votasaun Eskola Ensinu Báziku Filial (EBF) Fomentu I, ladun iha eleitór.
Prezidente meza Sentru Votasaun Eskola Sekundária Jerál 10 Dezembru, Nelson Martins, rekoñese taxa partisipasaun eleitòr iha sentru votasaun refere menus liu kompara ho eleisaun primeira volta.
“Primera ronde, taxa partisipasaun eleitór barak liu kompara ho agora daudaun menus. Iha eleisaun primeiru volta 19 Marsu foin lalais, ami loke tarde uitoan, no ema mai forma lubuk ona, kompara ohin ne’e, ami loke sedu, eleitór mai vota fila kedas, sira la forma, tama direta ba vota,” Nelson Martins ba Timor Post, iha Sentru Votasaun eskola 10 Dezembru, Tersa (19/04).
Nia dehan, númeru eleitór ida agora ne’e menus liu kompara ho númeru partisipasaun iha primeiru volta, ne’e eleitór barak.
“Iha primeira ronde, eleitór ne’ebé mak mai vota iha sentru 10 Dezembru ne’e, hamutuk 2264, maibé ohin loron dalaruma númeru ne’ebé ita rejista sei la too iha ne’ebá,” nia katak.
Portantu, eis Primeiru Ministru, Mari Alkatiri, mós rekoñese katak eleisaun segundu volta ne’e partisipasaun menus loos, más hein took lokraik sentru votasaun taka, dalaruma dadeer ne’e ema balun sei toba.
“Eleisaun ema laiha, dalaruma ema balun mós kolen ona, maibé ita husu de’it eleitór sira labele kolen, nune’e partisipasaun labele menus,” Alkatiri tenik.
Alkatiri kompara, iha eleisaun primeira volta, nia observa iha sentru votasaun sira, iha oras tuku 11:00, sentru sira kuaze ema forma nakonu, maibé segundu volta ne’e, sentru votasaun balun menus loos eleitór.(Lee Notisia Seluk Iha Jornal Timor Post/Asesu You Tube Timor Post)
778 total views, 3 views today
Bele hare Video Seluk :
Subscribe to Timorpost
