(Reportájen José Mauno-Jaime Pires/Editora Suzana Cardoso)
DILI (Timor Post) – Espresa pasa ezame nasional hodi konvoi motor hadulas Dili, ho uza atributu arte marsiais hodi dezeñu no hakerek iha farda sira maka Polisia Nasional Timor-Leste (PNTL) kaptura estudante besik na’in 55 no prende motor besik 29.
Tuir observasaun Timor Post nota katak, hafoin rona rezultadu ezame nasionál ne’ebé fó sai hosi kada eskola, iha maizu menus tuku 11:00 OTL maioria estudante sira hosi eskola públiku no privadu balun, ida-ida ho nia groupu halo desfile (pawai-Lian Indonezia) haleu Dili laran.
Sei nafatin hosi observasaun Timor Post, estudante hirak ne’e monta kanu resin ba sira nia motor. Sira gás motor tama sai fatin rame; merkadu, Estrada públiku no eskola. Estudante balun hafalun sira nia farda ho kazaku hakerek lia fuan no dezeñu slogan arte marsiais sira hanesan; IKS, PSHT no seluk tan.
“Estudante kuaze ruanulu-resin, sira mai barullu. Halai motor tuun sa’e no uza faru ka atributu arte marsiais nian maka gás tuun sa’e iha ne’e. Ida ne’e sira provoka situasaun,” esplika Komandante Polisia Postu Kristu Rei, Alexandrino da Costa ho naran kodiku Samurai ba Timor Post iha Bekora bainhira kaptura estudante sira lori ba sela polisia.
Samurai esplika liutan, estudante ne’e ema intelektual. Tenke hatene etika moris iha sosiedade no hakruuk ba lei hodi kontribui ba paz no dame. Fasilidade arte marsiais iha Nasaun Timor-Leste sensitivu. Kuandu hatais hodi desfile tuun sa’e bele provoka situasaun.
Tuir dadus ne’ebé fó sai hosi Samurai hateten, antes ne’e kaer tiha ona estudante balun no kontinua tan ho estudante nain 20 iha Becora. “Ami mai ho groupu,” hasara Samurai wainhira kaer estudante ne’ebé mak maioria husi eskola sekundáriu tékniku vokasionál Grupu teknolojia no indústria, ESTV-TI 28 Novembru Bekora, ESJ 12 Novembru no ESJ 5 de Maiu.
Nune’e tuir Samurai, Polisia sei la tolera. Tanba, lei bandu groupu organiza malu hodi hatais farda arte marsiais intrompe fali atividade públiku nian.
“Estudante sira ne’ebé maka uza atributu halo barullu iha fatin públiku, ami lori ona balu ba sela para halo identifikasaun, hafoin ida ne’e sei intrega ba parte investigasaun,” katak Samurai.
Antes ne’e, Komandante Polisia Nasionál Timor-Leste (PNTL) Munisípiu Dili, Superentendente Xefe, Henrique da Costa ba Timor Post, Sabádu (22/01/2022) hateten, hamutuk estudante na’in 55 maka bolu mai eskuadra polisia hodi halo identifikasaun maka foin kontinua ba Ministeriu Públiku
“Estudante ne’ebé ita bolu mai eskuadra polísia hodi halo identifikasaun ne’e liga ho Lei numeru.5/2017. Uza atributu Artemarsiais no arterituais,” dehan Henrique.
Aliende kaptura estudante katak Henrique, PNTL mós prende motorizada hamutuk 29 tanba la uza kapasete no uza kanu resin, ba kontra tranzitu nian hosi Polisia tranzitu Dili mak prosesu hodi aplika multa.
Tuir Komandante PNTL Dili nian ne’e hateten, estudante hamutuk na’in-55 ne’ebé mak PNTL halo identifikasaun ne’e maioria husi área Kristu-Rei hamutuk na’in 43. Hosi Vera Kruz na’in 10 no Dom Aleixo na’in rua.
“Atributu arte marsiais no arte rituais sira ne’ebé mak ohin sira uza hodi halo komboiu iha Dili laran no eskola hafoin PNTL kaptura mak atributu arte marisal IKA, PSHT no arte rituais 77,” hateten Komandante PNTL Munisípiu Dili, Superentendente Xefe, Henrique da Costa. (Lee notísia seluk iha jornál Timor Post/Asesu You Tube Timor Post)
2,017 total views, 6 views today
Bele hare Video Seluk :
Subscribe to Timorpost
