DILI(TimorPost)— Diretór Ezekutivu Asia Justice and Rights (AJAR), José Luis Oliveira, hatete, kazu sela detensaun Kaikoli, ne’ebé hamate José Bernardo de Jesus Soares, tuir loloos responsabilidade Primeiru Ministru Taur Matan Ruak nu’udar mós ministru interior, maibé durante ne’e ministru interior ladún iha esforsu atu asegura prosesu investigasaun ne’e la’o ho efikásia.
Prosesu investigasaun ba kazu sela Kaikoli to’o agora seidauk iha rezultadu tanba Ministru Interior laiha orientasaun ba Instituisaun PNTL no Polisia Sientífiku Investigasaun Kriminál (PCIC-sigla Portugés) hodi halo servisu ho efikásia.
Problema ida ne’e tuir AJAR, hatudu momoos failansu husi governu ida ne’e tanba labele orienta instituisaun Polisia ho PCIC, tanba Polisia ho PCIC ne’e iha governu nian okos.
“Tanba saida mak, labele orienta sira servisu ho efikásia, ita haree Indonézia ne’ebá ne’e kazu Sambo ne’e hotu tiha ona, tanba hetan apoiu husi Prezidente Repúblika nu’udar xefe Ezekutivu fó orientasaun atu oinsá bele deskobre buat sira ne’e,” dehan Jose ba Timor Post, Segunda (27/02).
Nia hatete, kazu sela Kaikoli ne’e vítima Bernardo mate kedas iha polisia nia liman maibé primeiru Ministru Taur Matan Ruak nu’udar Ministru Interior, nonook tiha hanesan problema ida laiha.
“Kazu sela ne’e, ha’u hanoin Polisia nia Servisu, maibé primeiru Ministru haluhan tiha, tuir loloos ne’e kuandu prosesu investigasaun hanesan ne’e tenke fó orientasaun ba Polisia no PCIC,” nia lamenta.
AJAR mós preokupa ho superior sira iha Instituisaun PNTL la hatudu servisu di’ak tanba kazu ne’e deskonfia iha membru na’in sia maka envolve maibé ikus mai membru sira ne’e livre ona no servisu hanesan baibain
Tuir AJAR, Ministru Interior tenke fó instrusaun ida ne’ebé mak klaru atu asegura investigasaun ne’e la’o duni, tanba bainhira la’o la di’ak fó impaktu ba kredibilidade governu nian tanba ladún sériu atu kombate kriminozu.
Prosesu Kazu
Antes ne’e, edisaun Timor Post (17/1), Investigadór Xefe, Floriano Serano, informa, nia parte labele fó komentáriu ba kazu ne’e tanba proseu investigasaun se la’o hela.
“Kazu sela ne’e, ami-nia investigadór Titular kona-ba kazu refere, prazu 30 dias, atu konklui prosesu ne’e, ita investigadór Titular sei halo relatóriu ba iha Ministériu Públiku (MP), tanba ne’e kazu sela ne’e iha hela prosesu investigasaun nia laran,” nia dehan.
Kronolojia
PNTL Suspeita matebian nu’udár suspeitu ba kazu konfrontu ida, tanba halo agresaun fízika hasoru vítima balun iha serimónia festa graduasaun ida iha área Audian, Postu Administrativu Na’in-Feto, Munisípiu Dili.
Ho kazu ne’e, ikus mai PNTL tun ba terrenu hodi kaptura suspeitu JB (matebian José Bernardo), lori ba detein iha sela detensaun Komandu Munisípiu Dili, iha Kaikoli.
Infezlimente iha Kinta (01/09/2022), suspeitu mate iha sela laran ho kondisaun tara-aan iha tuku sia kalan (19:02). (bet)
1,759 total views, 3 views today
Bele hare Video Seluk :