DILI-Profisionál saúde sira hanesan médiku, enfermeiru, parteira no pesoál sira iha área saúde nian hamutuk na’in 225 iha Munisipiu Dili, sei hapara husi servisu iha loron 31 Dezembru 2023 ne’e, tanba kontratu remata ona.
Diretora Servisu Saúde Munisípiu Dili, Agostinha Segurado, informa katak iha loron 31 fulan ne’e nian, kontratu remata inklui jestor sira ne’ebé ho estatutu kontratadu.
“Iha na’in 200 resin ne’e mos dezafiu ida ba situasaun ida ne’e, maibe hakarak ka lakohi, mensiona iha kontratu ne’e katak tenke hapara iha loron 31 ne’e, tanba kontratu remata ona”, nia hateten iha knaar fatin, Bairro Formoza, Kuarta (13/12).
Tuir nia, saida maka ba oin atu halo mak avaliasaun ba sira no pedidu estensaun.
“Ida ne’e ami rekomenda ona iha fulan kotuk, entrega ona ba iha Ministeriu Saude. Ami nia obrigasaun maka hato’o ba katak profisionais sira ne’e ami prezisa ho sira nia dezempeñu hanesan ne’e hodi kobre ba iha dezafiu iha fasilidade saúde sira”, nia hateten.
Diretora ne’e hatete Ministra Saude mos ko’alia ona katak sira ne’ebé nia kontratu remata iha loron 31 ne’e, tenke fila fali ba konkorre iha vaga sira ne’ebé iha.
Husi Servisu Saúde Munisípiu Dili nian aviza ona ba profisional saúde sira ne’ebé kontratu remata ona atu halo servisu nafatin hodi haree ba vaga sira no aplai.
“Labele garante katak ha’u nia pedidu ba ne’e haruka imi hodi kontinua, maibe ida ne’e desizaun husi Ministra Saúde ko’alia tiha ona,” nia hatete.
Ministra Saúde, Élia Amaral afirma katak profisional saude sira ne’ebe kontratu remata hosi rekrutamentu Governu anterior nian tenke hapara hodi halo jestaun viabilidade no avaliasaun.
Ministériu Saúde loke ona vaga sira ne’ebe hahu iha semana kotuk. Tanba ne’e, nia husu ba parte profisional saúde sira, pesoal administrasaun finansas sira bele konkore iha vaga sira ne’e.
“Ba pesoal saúde ne’ebe maka kontratu remata, ita tenke hapara husi servisu, depois maka tama fali servisu maibe sei liuhosi teste maka daudauk ne’e MS loke hela vaga”, refere nia.
639 total views, 3 views today
Bele hare Video Seluk :