Timor Post (11/10/2020)—Partidu Libertasaun Popular (PLP) lamenta Partidu FRETILIN viabiliza kargu Prezidente Autoridade no Administradór Munisípiu sira ba interese partidu nian.
Deputadu Bankada PLP, Noe da Silva, alias “Buka Tuir” afirma, prosesu rekrutamentu ne’ebé mak daudaun ne’e Ministériu Administrasaun Estatál (MAE) halo, la tuir kritériu ne’ebé mak iha, tanba ema ne’ebé mak ho diploma Eskola Primária, alias SD, bele liu fali, maibé ema sira ne’ebé mak ho Diploma S1 no S2 la liu.
Tanba ne’e, hanesan ema polítiku no reprezentante povu, husu Ministériu kompetente atu esplika kona-ba prosesu refere. Tanba tuir lei kargu Prezidente Autoridade ne’e tenke ema ne’ebé ho méritu no nivel-5 la leten.
“Ha’u reprezenta Partidu Libertasaun Popular (PLP), konserteza iha polítika ne’e, iha interese hotu, la iha partidu ida mak la interese, hanesan Partidu ne’ebé iha interese atu ba ukun, konserteza ami iha ami nia kandidatu rasik, soke mekanizmu ne’e mak ba ha’u pesoál ladún simu, tanba envés ita haree ba ema méritu, porezemplu Munisípiu Baukau, ema SD ida bele manan fali, ema S1 no S2 lakon fali, ida ne’e bazeia ba saida, tanba ida ne’e mak ha’u kestiona”, Buka Tuir informa asuntu ne’e ba jornalista sira, iha Palacio Nobre Lahane, segunda (12/10).
Husu kona-ba konkordánsia entre partidu tolu iha prosesu ne’e. Noe dehan la iha konkordánsia ruma entre partidu tolu, PLP, KHUNTO no FRETILIN, tanba FRETILIN viabiliza de’it iha Governu, la’ós Prezidente Autoridade no Munisípiu sira.
“Ne’e ba kestaun membru Governu, la’ós ba Prezidente Autoridade Munisípiu sira. Iha métodu Governu mak hatete dehan membru Governu sira ne’ebé mak pertense’ ba CNRT ne’e, hela ba partidu viabilizador, mais la’ós sentidu katak Prezidente Autoridade no Postu Administrativu sira, hothotu tenke ba FRETILIN, ba ha’u ida ne’e la loos”, Noe afirma.
“Ita tenke kolia didi’ak ba malu lai, selae ha’u hanoin ladún di’ak ba ami hanesan partidu polítiku. Tanba ami bolu ita boot sira mai atu viabiliza, viabiliza ne’e kerdizér katak objetu ida ne’e atu labele monu, tanba ida ne’e mak ami bolu ita boot sira, maibé ikus mai ami atu sai fali vítima, ne’e labele” Noe kestiona.
Noe hatete, PLP sei la tuur nonook ba kestaun ida ne’e no sei buka atu konversa ho nia aliadu FRETILIN no KHUNTO.
“Hanesan polítika ami iha nafatin hanoin atu oinsá mak bele kolia ho sira, ne’e ita tenke kolia, labele dehan ita boot sira mai foti hanesan ne’e ami nonook de’it, ne’e labele tenke kolia”. Noe informa. (Jornalista : Julio Salinas Soares)
715 total views, 3 views today
Oinsa Ita nia Reaksaun iha Notisia Nee?
Bele hare Video Seluk :
1
/
2032
#BAINAKAESPESIAL - TENKI KUIDA OAN SIRA, LABELE INVOLVE IHA KRIME
SEI HO FOKUPERS REALIZA DISKUSAUN MEZA REDONDA PREPARA OJE
GOVERNU HO CUBA SELEBRA FESTIVAL CAYMAN TO CAYMAN BA DALA 4
1
/
2032