Timor Post (08/09/2020)-Koordenadór Lia Nain ba Serimónia repozisaun Meza Prezidénsia Parlamentu Nasionál, Eugenio Sarmento, konsidera lian nain Karketu Motain, Pio de Ataíde, hamulak lahatene.
“Iha serimónia hatuur meza ne’e ami husu señór João ho lia na’in na’in tolu mai reprezenta Karketu ema seluk la mai, Karketu mai lori ema na’in 4 ne’e reprezentativu ona, pior liu nia (Pio) la’ós lia Nain, nia hanesan liu rai oan nu’udar Karketu oan, nia hamulak lahatene”, Eugenio ba jornalista sira iha parlamentu nasionál Tersa, relasiona protesta ne’ebé Pio hato’o ba Parlamentu Nasionál (08/09).
Eugenio haktuir família Pio de Ataíde hosi lisan Karketu iha tinan kotuk halo karta ba iha Sekretaria Estadu Arte no Kultura (SEAK) indika Señór João Ataíde alias Akoli maka responsavel ba kultura tradisionál iha uma lisan Karketu no hetan koñesimentu hosi autoridade lokál, hanesan Xefe Aldeia, xefe suku to’o administradór.
“Bazeia ba karta ida ne’e ami husu señór João ho lian na’in tolu reprezenta Karketu. Pio Ataide nia la’ós lia na’in.
Nia hanesan Liurai oan nu’udar Karketu oan, nia hamulak lahatene. Ema lia na’in ne’e tenke hatene hamulak, depois hori bainhira mak liu rai oan ida sai fali lia na’in. Liurai oan posisi hanesa liurai oan labele hadau fali knar lia na’in” kestiona Eugenio.
Nia tenik Família rasik mak halo karta mai iha SEAK dehan koordenadór lian Karketu mak João Ataíde entaun konvida mak João, problema iha ne’ebé laiha. João Ataíde mós la’ós ema seluk, Pio Ataíde nia maun alin rasik.
Eugenio hateten sé sira mai tiha mak dehan la mai ne’e sira nia problema labele fó sala ema sira ne’ebé organiza ne’e.
Iha parte seluk Eugenio lahatene kona ba protestu ne’ebé Pio Ataíde hato’o ba iha parlamentu nasionál. Tuir Eugenio katak husik ba ema hotu bele hato’o tanba sidadaun hotu iha direitu atu bele espresa sira nia hanoin.
Entretantu, iha loron Segunda (07/09), lian Nain hosi Karketu Motain, Pio de Ataíde, hatama karta ba Prezidente Parlamentu Nasionál inklui Bankada sira hotu, tanba konsidera serimónia ritual ba ré pozisaun meza prezidénsia parlamentu nasionál la’o la tuir ninia fukun no la konsidera uma ho ahi husi Dili nian.(Jornalista Julio Salinas Soares)
1,256 total views, 3 views today
Bele hare Video Seluk :
Subscribe to Timorpost
