DILI (Timorpost.com)—Asosiasaun Jornalista Timor-Leste (AJTL), Kinta (06/06/2024), realiza Konferénsia Imprensa hodi hato’o solidariedade ba aktu tentativa hosi pesoál protokolu PA-RAEOA nian hasoru Jornalista Ajénsia Notísioza Tatoli, Abílio Elo Nini, iha loron 4 Fulan Juñu 2024.
Sekretáriu Jerál AJTL, Acaçio Pinto, hatete, aktu tentativa hosi pesoál protokolu PA-RAEOA nian hasoru Jornalista Ajénsia Notísioza Tatoli, Abílio Elo Nini, nu’udar aktu tentativa no ameasa ida ba independénsia jornalizmu no liberdade imprensa iha Timor-Leste hanesan haktuir iha Konstituisaun RDTL, Artigu 40 no 41 no Lei Komunikasaun Sosiál Artigu 41 kona-ba atentadu ba liberdade informasaun.
“Atu proteje kualidade demokrasia iha Timor-Leste iha kontestu garante boa governasaun no kontabilidade, mídia no jornalista hola papél importante atu asegura sidadaun sira nia direitu espresaun nian no sira nia direitu ba informasaun liuhusi kobertura no publikasaun notísia no programa sira mídia nian”. Haktuir Sekretáriu Jerál AJTL, Acaçio Pinto, iha nota konferénsia Imprensa.
Nia informa, iha rejime sistema polítika demokrasia, iha ámbitu liberdade imprensa nian, mídia no jornalista presiza livre atu hala’o sira ninia serbisu iha fatin ne’ebé de’it. Liuliu iha espasu públiku hanesan instituisaun sira estadu nian.
“Tanba ida ne’e entidade hotu-hotu iha obrigasaun atu fo espasu livre ba jornalista sira atu asesu ba informasaun sira ne’ebé iha ligasaun ho serbisu públiku nian. Tanba liberdade imprensa mak sai nu’udar espasu ba sidadaun sira atu hato’o sira nia hanoin no komentáriu hodi hakonu prinsípiu check and balance ba servisu hotu-hotu entidade Estadu nian”. Nia dehan.
Aktu violentu hasoru jornalista Tatoli ne’e hakanek ona liberdade imprensa no valor demokrasia iha Timor-Leste iha tempu ne’ebé Timor-Leste ninia index Liberdade imprensa tuun husi TOP 10 ba TOP 20.
AJTL haree katak aktu violentu ida-ne’e sei afeta index ranking liberdade imprensa iha tinan sira tuir mai. Bazeia faktu no situasaun ne’ebé temi leten AJTL harak hato’o nia pozisaun hanesan tuir mai:
- AJTL kontra no kondena aktu violentu hasoru jornalista Tatoli ne’ebé komete husi pesoál protokolu irresponsavel RAEOA nian tanba aktu violentu ne’e sei hata’uk jornalista no mídia atu iha kontestu kobertura no publikasaun notísia, liuliu atu garante papél! media kontrolu sosiál.
- AJTL konsidera aktu violentu ida-ne’e la-hatudu mentalidade demokrátiku pesoál entidade sira estadu nian atu garante boa governasaun no kontabilidade iha país demokrátiku Timor-Leste. Maibé hatudu fali mentalidade vandalizmu hodi impede midi No jornalista atu asesu ba informasaun sira ne’ebé iha ligasaun ho servisu públiku nian.
Ho pozisaun ida-ne’e, AJTL husu ba:
- Prezidente RAEAO, Sr. Rogério Tiago Lobato atu foti medida no sansaun forte hasoru pesoál protokolu ne’ebé halo aktu violentu hasoru jornalista Tatoli iha espasu públiku iha Oekusi Ambenu.
- Husu SECOMS atu komunika ho instituisaun sira Estadu nian atu respeita midia no jornalista nian servisu no kolabora atu sira livremente asesu ba espasu públiku hotu-hotu hodi asesu informasaun sein iha impedimentu.
- Konsellu Imprensa no Asosiasaun Jornalista hotu-hotu atu kontinua sosializa Lei Komunikasaun sosiál ba entidade sira Estadu nian, liuliu entidade sira RAEOA nian atu sira komprende papél mídia no jornalista nian iha país demokrátiku ida-ne’e.
- Jornalista no kanál mídia hotu-hotu iha rai-laran atu fó solidariedade ba malu hodi kontinua publika kazu ne’e to’o hetan solusaun loloos no justu.
- Jornalista no kanál mídia hotu-hotu atu nafatin kumpre Kódigu Étika Journalistic, Lei Komunikasaun Sosiál no prinsípiu sira jornalizmu nian bainhira hala’o knaar jornalizmu iha ne’ebé de’it atu nafatin asegura no garante liberdade imprensa no liberdade espresaun iha Timor-Leste.
552 total views, 3 views today
Bele hare Video Seluk :
Subscribe to Timorpost
