DILI, (timorpost.com)— Profesór kontratadu 2023 ne’ebé ohin, (12/02) hala’o protesta iha Ministériu Edukasaun lamenta tanba sai vítima ba dalarua, sai vítima priméiru hapara sira-nia kontratu no sai vítima daruak mak hetan tortura no kapturasaun husi Polísia Nasionál Timor-Leste (PNTL).
“Ohin hetan kaptura tanba misaun ne’ebé ami halo durante ne’e, tanba ne’e mak ohin loron hetan tan kapturasaun. Ami lamenta tebtebes ba asaun kaptura ne’e, durante asaun hirak ne’ebé ami halo hahú ho diálogu hodi hato’o ami-nia karta ezijénsia atu nune’e ministra bele fó solusaun ba ami, maibé prosesu sira ne’e hotu hahú husi ami hato’o ami-nia karta, audénsia sira la konsidera, ne’e hanesan buat ida karik trata ami hanesan la’os hanesan ema sidadaun ho ida-ne’e mak ami lamenta tebtebes”, dehan profesór kontratadu, Paulo De Jesus Magno, ba jornalista sira iha Jardin 5 de Maio, Segunda, (12/02 ) hafoin parsipa asaun protesta iha edifísiu Ministériu Edukasaun, Vila-Verde, Dili.
Nia hatutan “Oinsá mak bele sai hanesan sidadaun ida laiha liberdade atu hato’o opiniaun ho diréitu ne’ebé mak iha. Hanesan profesór tinan barak, lubuk dedika ami-nia-an ba nasaun ne’e liuhosi ami-nia hanorin, oitavu Governu konsege rekoñese ami, to’o mai fali iha nuno Governu mak halo fali polítika oinsá mak bele halo hanesan ne’e, tanba ne’e ami lamenta hanesan sidadaun”
Profesór ne’e lamenta tanba Governu Konstitusionál da-IX la rekoñese sakrifísiu ne’ebé profesór sira halo durante tinan barak to’o hetan kontratu iha tinan 2023, maibé rekoñesimentu ida-ne’e lakon leet de’it.
Durante ne’e, profesór kontratadu tinan 2023 hakarak halo diálogu ho Ministra Edukasaun (ME), Dulce de Jesus Soares, maibé laiha solusaun ikus mai tenke hetan kapturasaun husi autoridade seguransa.
“Buat hotu ami halo hotu ona no hakarak halo diálogu ho ministériu edukasaun tuir despaixu ne’ebé ami hetan husi Primériu Ministru katak ministériu edukasaun tenke rezolve iha fulan ida nia-laran ba problema profesór sira-nian, to’o ikus, ohin loron hetan kaptura husi polísia sira ba kolega sira ne’e, no agora dadauk ami-nia ezijénsia, buat hirak ne’e limita tiha ami-nia diréitu nu’udar sidadaun ida”, hakotu.(*)
1,143 total views, 3 views today
Bele hare Video Seluk :
Subscribe to Timorpost
