DILI, (timorpost.com)– Diretór ezekutivu Forum Organizasaun Naun Govermentál Timor-Leste ( FONGTIL), Valentim da Costa Pinto, husu Governu liuhosi guarda floresta tenke halo vijilánsia maka’as atu nune’e evita komunidade kasa animál protezidu iha teritóriu nasionál.
Durante ne’e, tuir observasaun FONGTIL nian nota katak komunidade kontinua kasa animál protezidu ka balada fuik sira hodi halo negósiu, tanba ne’e, Governu presiza halo vijilánsia atu nune’e komunidade labele kasa.
“Uluk kedas ami hatete ona katak, la’os totalmente komunidade sira ne’ebé kaer balada protezidu sira ne’e lae, maibé parte Governu mós fó esforsu liuhosi sira-nia guarda floresta sira ne’ebé destaka ne’e tenke halo vijilánsia kontinua no tenke kontinua divulga kona-ba lei bandu atu labele ba kasa animál protezidu, ne’e para ita komunidade sira labele kaer balada sira ne’ebé konsidera hanesan protezidu, inklui labele oho no fa’an”, Valentim da Costa Pinto, informa ba Timor Post, Sábadu, (10/02).
Nia hatutan “Iha kapitál Dili lei bandu maibé komunidade kontinua kaer hodi halo atividade komérsiu iha fatin-fatin. Ho ida-ne’e, ita husu Governu presiza tenke halo vijilánsia liuhosi sira-nia guarda floresta, tanba guarda sira mesak labele, entaun presiza tenke servisu ho autoridade sira iha nível suku no aldeia, hodi bele kontinua informa para sira labele livre husi kasa ita-nia balada sira ne’ebé ita próteze, Ita konsidera ne’e úniku dalan, ne’ebé ami hanoin Governu liuhosi guarda tenke halo servisu maka’as atu bele evita kasa balada protezidu sira ne’e”.
Aktu kasa balada fuik protezidu sira la’os akontese ohin loron maibé akontese ona dezde beiala sira-nia tempu, tanba ne’e presiza sosializa lei próteze balada fuik ka animál protezidu sira.
Bainhira Governu la halo vijilánsia no kuidadu mak Timor-Leste bele lakon eransa animál protezidu ka animál fuik sira hanesan Loriku, Rusa fuik no animál fuik sira seluk.
Hatan ba preokupasaun ne’e, Diretór Nasionál Biodiversidade (DNB), Rui dos Reis Pires, rekoñese katak durante ne’e komunidade kontinua kasa animál protezidu sira no negosia iha merkadu.
Diretór ne’e rekoñese atividade komérsiu balada fuik ne’e sai problema tanba realidade lei bandu atu labele kaer animál protezidu sira maibé komunidade kontinua kaer hodi fa’an no sosa.
Esforsu ne’ebé Governu halo mak kontinua koordena ho autoridade seguransa no autoridade lokál hodi divulga informasaun ba komunidade.
“Esfosru ne’ebé ami halo mak ami servisu hamutuk ho polísia no servisu hamutuk ho autoridade lokál sira, no mós lideransa komunitária suku ho nian konsellu suku sira, atu habelar informasaun bazeia ba ita-nia lei ne’ebé iha, ba ema hotu-hotu atu komprende katak labele kaer manu fuik sira ne’e, tanba lei próteze no benefísiu husi animál fuik ba ita-nia ne’e saida, ida-ne’e ita halo sosiliza to’o suku no aldeia sira ne’e mais infelizmente até agora ema seluk kaer nafatain animál protezidu ne’e ba fa’an”, Diretór DNB ne’e hatete.
Durante ne’e, DNB servisu hamutuk autoridade seguransa konsege kaer sidadaun na’in-5 ne’ebé kasa animál fuik ba tribunál maibé kazu ne’e foin primeiravez nune’e tribunál deside aplika de’it Termu Identidade Rezidénsia (TIR) no bandu sira labele kaer no fa’an animál protezidu sira.
Diretór ne’e apela “Ba maluk timoroan hotu katak ema ho animál fuik sira no ai-horis sira dependente ba malu, ema la moris mesak, tanba ne’e mak husu ba komunidade no maluk sira ne’ebé toman fa’an animál sira ne’e, di’ak liu labele fa’an no fó hatene ba maluk sira ne’ebé gosta sosa no haki’ak ne’e móss para ona, atu nune’e próteze no konsellu ita-nia animál fuik sira ne’e para fó benefísiu ba ita. Husu ba maluk sira atu ita hamutuk hodi próteze ita-nia ai-horis no animál fuik sira ne’e, liuliu animál sira ne’ebé protezidu iha ita-nia rai tuir lei”.
Animál protezidu ne’ebé indetifika iha rai mak hanesan, Kakatua no Loriku, manu Makikit sira ne’e protezidu tanba iha lei hatete, inklui mós animál tasi mak hanesan Karau Tasi, Gulfinu, Baleia, ikan Hiu no Lenuk.(*)
1,251 total views, 3 views today
Bele hare Video Seluk :
Subscribe to Timorpost
