DILI, (timor post.com)— Autoridade Lokál kestiona servisu Ministériu Justisa (MJ) liuliu servisu teras no propriedade kona-ba atribuisaun títullu rai ba povu ne’ebé durante ne’e la’o tarde liu, tanba ne’e kuaze tinan rua nulu-resin problema rai laiha solusaun.
“Ha’u ein jerál kurizi ita-nia Governu, liuliu Ministériu Justisa katak ho lian melayu karik ‘terlabat’ tanba ita Timor-Leste restaura ona ukun-an ne’e iha dia 20 Maiu 2002, ita hetan soberania ne’e kuaze tinan 20 resin, maibé ladauk fó diréitu titúllu rai ba sidadaun sira tuir konstituisaun”, Xuku suku Madohi, Bernardino de Cristo Ferreira, hato’o lia hirak ne’e ba Timor Post iha nia kna’ar fatin sede suku Madohi, Sesta, (08/12/2023).
Tanba ne’e nia sujere Governu, Parlamentu Nasionál, no órgaun kompetente sira katak, atu hatuur vizaun Estadu tenke sériu implementa programa Governu, tenke tau prioridade kedas, labele halo alterasaun beibeik mais ikus mai Estadu mak lori todan.
Xefe suku Madohi ne’e hatete, “Iha artigu 54 hatete dehan, timoroan hotu-hotu iha diréitu para hetan rai pedasuk ida, maibé fó legalidade para atu hetan rai pedasuk ida, kuaze tinan 20 resin la’o lentu”.
“Husu de’it ba instituisaun relevante sira katak, povu mak see?, rai ne’e mak see?, Governu ne’e mak see?, See komponente hirak ne’e mak sai Estadu Timor-Leste tuir loloos problema ne’e labele akontese. Ha’u bele dehan katak, see karik rai, povu, governu, hamutuk iha Estadu ida, tuir loloos problema disputa rai entre povu ho Governu labele akontese, mais ha’u admira akontese, ida-ne’e mak ita-nia frakeza”, Xefe suku Madohi kestiona problema ne’e relasiona ho komunidade sira ne’ebé hela iha rai Estadu.
Tanba ne’e, nu’udar autoridade lokál kestiona problema ida-ne’e tanba durante tinan 20 ona Governu seidauk fó títullu rai ba povu tuir konstituisaun haruka.
Antes ne’e, Koordenadór Nasionál Rede ba Rai, Pedrito Vieira, hatete Teras no Propriedade la fó importánsia ba aplika Lei númeru 13/2017, tanba ne’e maka povu ki’ik sira sai vítima ba problema rai iha nia rain rasik.
“Lei númeru 13/2017 ne’e dala ruma sira implementadór, liu-liu Terras Propriedade ne’ebé maka implementa lei ne’e, dala ruma la fó importansia ba lei ne’e. Sira haree liu dekretu ba Lei númeru 1/2003 ida-ne’e, maibé ita-nia lei iha tiha ona, loloos aktu saida ruma ou prátika ruma ne’ebé mosu iha ita-nia rai ida-ne’e bazeia ba Lei númeru 13/2017, ne’ebé ho títullu rejime espesiál ba titulár rai nian”, Koordenadór Rede ba Rai, Pedrito Vieira, relata ba Timor Post iha nia kna’ar fatin edifísu Rede ba Rai Palapasu, Segunda, (04/12) foin lalais.
Nia hatutan, Lei Númeru 13/2017 ida-ne’e promulga ona husi Prezidente Repúblika, tanba ne’e maka rede ba rai husu nafatin terras propriedade ka’er lei ne’e atu implementa, atu rezolve kualker polémika rai iha nasaun ida-ne’e maka bele fó kontente ba povu ki’ik sira.
“Ha’u haree lei ne’e maka respeita valores diréitu povu ki’ik sira-nia, lei ne’e di’ak, maibé ha’u la kompriende tanba saida maka terra propriedade la konsidera lei ne’e”, katak Pedrito.
Tuir nia, teras propriedade la aplika lei ne’e signifika komete krime, laiha sentidu Estadu, tanba Estadu rasik maka prodúz lei ne’e, Prezidente Repúblika maka promulga.
Tanba ne’e, asaun ne’ebé atu bele fó presaun ba instituisaun Estadu sira ne’ebé liga ba títullu rai nian, presiza iha asaun sosiedade sivíl no organizasaun masa sira seluk tenke halo advokasia maka’as ba implementasaun lei númeru 13/2017 para implementa ho sériu hodi rezolve problema rai iha nasaun ida-ne’e.(*)
1,032 total views, 3 views today
Bele hare Video Seluk :
Subscribe to Timorpost
