DILI (TimorPost.Com)— Komandu Polísia Nasionál Timor-Leste (PNTL), ohin Sábadu (02/12) posibilidade sei hapara asaun Grupu Povu Ki’ik (GPK), iha Tasi-tolu para ida-idak fila ba sira nia hela fatin.
Tuir observasaun Timor Post, ba fatin konsentrasaun GPK Tasi-tolu, iha oras tuku 8:00, baraka ida-idak sei kontinua dada, ema kontinua halo atividade konsentrasaun hodi hein rezultadu, maski iha Sesta lokraik udan tun hodi halo sira preokupa uitoan ba sira nia kondisaun.
Maibé iha dadeer ne’e kedas grupu GPK ida-idak halo limpeza ba ida-idak nia baraka, hodi antesipa udan monu rai, barak ida-idak komesa kee bee dalan baraka nian atu fó kondisaun ba sira atu hela maski udan monu rai.
Relasiona kondisaun ema sira envolve iha asaun solidáriu GPK, bainhira udan monu rai iha Sesta,01/12 afeta ba sira nia hela fatin, Komandu Polísia liuhosi Komandante seksaun operasionál Munisípiu Dili, Inspetór Xefe Jose Luis Amaral, halo kedas koordenasaun ho responsavel GPK para atu haruka povu ki’ik sira ne’e fila ba sira nia hela fatin.
Komandante Operasaun Dili, Inspetór Xefe Jose Luis, dehan tempu udan, inan-aman sira kontinua hela lona sira ne’ebé dada iha fatin konsentrasaun Tasi-tolu sei afeta ba sira nia kondisaun saúde, aleinde inan-aman sira nia toos no natar sira abandona la kuda.
Tanba ne’e Komandante ko’alia ho responsavel para haruka inan-aman sira ne’e fila ba ida-idak nia fatin, depois rezultadu asaun ne’ebé GPK halo iha ona akordu ne’ebé ninia reprezentante de’it maka lori dokumentu protestu ne’e entrega ba Primeiru Ministru.
“Ohin dadeer ne’e to’o lokraik sira bele fila ona iha ida-idak nia hela fatin, ha’u dehan hanesan ne’e sira nia karta protestu Governu simu ona, agora udan tun mai kona katuas, ferik sira moras tanba hela iha lona okos, nusa la fila tiha, segunda,4/12 ne’e delegasaun mak ba hasoru de’it Primeiru Ministru hato’o sira nia ezijénsia”, Komandante Seksaun Operasaun Munisípiu Dili, Inspetór Xefe Jose Luis, iha fatin konsentrasaun Tasi-tolu, Sábadu, (02/12).
Komandante Operasaun Munisípiu Dili, Jose Luis, hatete, asaun ne’e la presiza halo tanba governu simu tiha sira nia prezensa no governu husu responsavel GPK hato’o kronolojia problema rai Aimeti-laran, entaun dalan iha ona para reprezentante GPK de’it maka bele lori relatóriu disputa rai Aimeti-Laran entrega diretamente ba Primeiru Ministru.
“Governu simu maun sira ne’e, entaun semana oin mai ne’e reprezentante de’it na’in 10 hanesan ne’e maka lori relatóriu kazu rai Aimeti-laran ne’e ba entrega Primeiru Ministru”,Komandante Jose Luis konversa ho responsavel GPK iha Tasi-tolu.
Nia subliña, Maun sira haree agora ne’e tempu udan monu rai, povu ki’ik sira kontinua hela iha ne’e, sira abandona tiha sira nia toos, sira nia natar entaun ladún di’ak, tanba ne’e husik inan-aman sira ne’e fila ba sira nia hela fatin para atu halo servisu ba sira nia toos no natar.
Enkuantu parte seluk reprezentante GPK, Jaime Soares da Costa, apresia ho ideia ne’ebé hato’o ba asaun GPK sira atu haruka inan-aman sira fila ba ida-idak nia hela fatin atu haree sira nia toos no natar.
“Durante Ami nia asaun hetan seguransa di’ak hosi Polísia, ami agradese ba ida ne’e, komandante mós ideia di’ak, ami sei haree para atu haruka inan-aman sira fila, depois responsavel maka lori relatóriu kazu Aimeti-Laran ba entrega Primeiru Ministru, ne’e mós ideia di’ak”, responsavel, GPK, Jaime, agradese.
Tanba ne’e maka GPK aseita ona ideia komandante Operasaun Munisípiu Dili, atu haruka inan-aman sira fila ba sira nia hela fatin, depois responsavel maka sei reprezenta hato’o karta protestu ne’e ba entrega Primeiru Ministru atu foti desizaun kona-ba kazu rai Aimetin-Laran.(*)
1,005 total views, 3 views today
Bele hare Video Seluk :
Subscribe to Timorpost
