BAUKAU (timorpost.com) – Ministru Administrasaun Estatál, Miguel Pereira de Carvalho, Inaugura Sentru Komité Programa Movimentu Hafoun Aldeia (PMOHA) ne’ebé lokaliza iha Ra’ameta, aldeia Buibau, suku Buibau, postu administrativu Baukau Vila.
Tuir dekretu lei nú.23/2021 ne’ebé aprova programa PMOHA, nu’udar programa ida ne’ebé mak atu halo movimentu iha aldeia sira hotu iha territóriu Timor laran tomak, hodi nune’e bele hafoun fila fali sira nia aldeia sira liuhusi atividade ekonómika sira ne’ebé mak komunidade sira iha kondisaun sira atu halo. Ba dahuluk liuhusi konstrusaun sentru PMOHA nian ne’ebé mak utiliza orsamentu husi Ministériu Administrasaun aloka mai iha aldeia sira.
“Ita nia infra-estrutura sira iha suku no mós Aldeia sira ne’e, ita halo atu komunidade sira hetan benefisia husi infraestrutura sira ne’e, maibé mós hodi insentiva ita nia populasaun sira hodi nune’e bele halo atividade ekonómiku ne’ebé sira halo, nune’e tinan 5 nia laran sira bele hetan retornu, bainhira governu la fó ona subsídiu ba sira maibé sei kontinua no halo nafatin atividade ekonómika sira ne’e,” nia hateten iha ámbitu inaugurasaun sentru PMOHA iha Baukau, Kinta (07/06).
Nia dehan, ida ne’e parte ida husi programa oitavu GK nian ne’ebé mak iha tinan 2020 ita boot sira hare iha atividade no programa sira, governu introdús programa sira ne’ebé mak atu rekopera fali ita nia ekonomia, ida mak programa PMOHA, nu’udar programa governu nian mak hanaran “Cadeia de valor”.
“Atu hasa’e produsaun iha unidade lokál sira, hodi nune’e ita halo ligasaun ho sira ne’ebé presiza mak hanesan merkadu lokál no mós merkadu ne’ebé mak kria husi atividade governu nian hanesan Programa Merenda Eskolár, bele konsumu produsaun ne’ebé mai husi ita nia komunidade sira,” nia hateten.
Ministru ne’e mós subliña, oitavu governu halo liuhusi programa PMOHA ne’e halo ho intensaun foun ida iha dezenvolvimentu iha área rural sira atu governu sentrál labele investe de’it atu halo infraestrutura sira ne’ebé mak hanesan sosiál de’it, maibé mós investe iha infraestrutura sira ne’ebé mak nia funsaun ekonómika envolve komunidade sira hodi hala’o atividade ekonómika sira hodi dezenvolve ekonomia lokál sira.
Governante ne’e hatete, aldeia sira ne’ebé sai ona benefisiáriu sei kontinua simu nafatin subsídiu ho orsamentu rihun 20 USD, durante tinan 4, tuir mai atu sira bele utiliza orsamentu sira ne’e hodi hala’o atividade sira iha aldeia nia laran, ekonomikamente sira hakiak animal, agrikultura no mós atividade ekonómika sira ne’ebé iha aldeia refere.
“Ha’u nia mensajen ba populasaun sira hotu iha area suku Buibau, aldeia Buibau, tanba husi aldeia 18 ne’ebé oitavu Governu Konstitusionál introdús programa ida ne’e, ha’u husu ba populasaun sira atu bele involve an iha atividade ekonómika sira ne’ebé mak grupu ida ne’e ho ema 17 hahú ona, bele involve barak liután sei produs rezultadu boot liu, haree husi “pontu de vista” ekonomia nian,” nia hatutan.
Tuir mai rekomenda atu programa di’ak hanesan ne’e, governu bele hare no halo kontinuidade ba programa sira ne’e, tanba programa refere involve direta husi populasaun sira no benefisia direta husi populasaun sira, husi governu sentrál hala’o de’it nia funsaun atu fasilita transferénsia no garante apoiu refere mai to’o iha suku sira tama xefe suku membru komunidade sira hotu mak implementa programa ne’e.
Iha serimónia inaugurasaun sentru PMOHA ne’e hetan partisipasaun husi Xefe Gabinete Reprezenta MAPCOMS, DGAF, DGDR, DGAN, Inspetór Jerál MAE, DG Agrikultura, Prezidente Autoridade Munisipál Baukau, reprezentante Komandante F-FDTL Komponente Terestre ho nia ekipa, Komandante PNTL ho nia ekipa, Diretores Nasionais no mós Xefe Departamentu sira husi MAE, Diretores Munisipais sira, Diretór husi Rai Matak, Xefe suku, xefe Aldeia, Membru sira husi PMOHA, Diretór Saúde Munisipál Baukau, Juventude Feto no Mane inklui Komunidades sira husi suku Buibau.
1,671 total views, 9 views today
Bele hare Video Seluk :
Subscribe to Timorpost
