Jornalista Caetano Guterres / Editór Noémio Falcão
Baukau (Timor Post)—Vigáriu Jerál Dioseze Baukau, Padre Francisco Pinheiro hakotu iis iha loron Tersa madrugada (24/08/2021) iha nia kuartu, Semináriu São João Paulo II, Baukau.
Amu Bispu Dioseze Baukau, Don Basílio do Nascimento konfirma, horiseik Padre Pinheiro sente moras uitoan iha kakorok. Maibé bainhira Padre maluk sira atu lori ba ospitál matebian rasik lakohi, no hakarak ohin maka ba ospitál maibé iha madrugada Padre Pinheiro hakotu ona iis.
Amu Bispu sente lakon boot.
Entretantu Padre Arlindo Leonardo Siquera da Silva nu’udar Vigáriu Piskopal Assuntu Pastorál Dioseze Baukau haktuir, komesa segunda no tersa semana kotuk Padre Pinheiro sente isin baruk maibé sei tuir retiru anual iha loron rua ne’e. No iha loron kuarta Padre Pinheiro la partisipa ona tanba mear no nia lamenta ho kondisaun ne’e. Maibé loron hirak tutuir Padre viazen ba Dili no foin fila iha sábadu liu ba ho kondisaun di’ak hela. No to’o hodikalan, maka ema hotu iha semináriu atrapalla tanba haree Padre nia kondisaun hatudu grave.
“Loloos horkalan atu lori ba ospitál maibé Nain rasik dehan husik ba Aban dader (ohin) maka imi lori ha’u ba. Maibé la to’o dader husik iis ho de’it seminarista rua mak iha ne’eba,” haktuir Padre Arlindo ba Timor Post.
“Ami hotu hanoin dehan moras simples. Ami konsidera la’ós sériu,” Padre Arlindo dehan.
Ho notísia ne’e, família no kolega sira hakfodak tebes no sente nasaun lakon ema di’ak ida.
Eis seminarista atuál Sekretáriu Jerál Partidu Demokrátiku, António da Conceição Kalohan haktuir, Padre Pinheiro nu’udar nia alin eskola hahú eskola hamutuk iha Eskola Nossa Señora de Fátima, Lahane-Dili.
Kalohan dehan, Padre Pinheiro mós ba kontinua eskola kona-ba espiritualidade iha Jakarta no muda ba iha Malang-Indonézia to’o sai Amu Lulik.
“Ami koñese malu di’ak hanesan kolega seminarista sai ba frater iha tempu neba. Ema ida ne’ebé iha vida espirituál maka’as tebes no halo belun di’ak ho ema hotu-hotu,” Kalohan haktuir ba Timor Post via telefone.
Nia sente triste tanba lakon ema di’ak ida ne’ebé otas mós la’ós boot liu. Liu ona ba mundu seluk inkuantu nia asume kna’ar ne’ebé importante tebes iha Dioseze Baukau hanesan Vigáriu Jerál.
“Nia hanesan mos professor iha semináriu maior, i ita bele dehan mós dosente ida ne’ebé estuda kona-ba istória da igreja nian, hahú husi vida satu-santa sira nian. Nia eskola mos kona-ba Patolojia. Tanba ne’e, ita lakon,” Kalohan subliña.
Kalohan hatutan, Padre Pinheiro koñese di’ak igreja katólika nia moris loloos ke konsideradu hanesan fonte prinsipál iha edukasaun seminarista sira nian.
“Tanba ne’e, ohin rona notísia ne’e ha’u hakfodak tebes i sente lakon boot ida tanba ema di’ak ida ne’ebé maka sei bele kontribui hela ba nasaun iha vida formasaun ba futuru saserdote, iha vida espiritual sarani sira nian, administrasaun ba dioseze. Nia sei bele halo buat barak, maibé ha’u lamenta tanba nia lakon ona nia vida,” Kalohan hatete.
Padre Pinheiro moris iha loron 16 Outubru 1963 iha Same Holarua-Munisípiu Manufahi.
1,088 total views, 3 views today
Bele hare Video Seluk :
Subscribe to Timorpost
