DILI—Prezidente Repúblika Francisco Guterres Lú Olo demite Taur Matan Ruak (TMR) husi Primeiru Ministru (PM) maka bele viabiliza formasaun governu dasia husi koligasaun foun CNRT, PD, KHUNTO, UDT/FM no PUDD.
“Prezidente repúblika simu ka la simu (karta demisaun hosi TMR), kuandu nia simu mak viabiliza formasaun governu. Se la simu entaun kontráriu. Ne’ebé, ita hein de’it desizaun prezidente repúblika,” Xefe Bankada CNRT, Duarte Nunes hatete ba Jornalista sira iha Uma Fukun Parlamentu Nasionál, Kuarta (04/03/2020).
Duarte hatete, koligasaun preparadu ona ba formasaun governu foun.
“Primeiru ministru atuál hato’o ona nia pedidu demisaun. Signifika, viabiliza ona formasaun governu foun, maibé prezidente mak deside simu ka la simu. Ita hatene katak laiha partidu ida mak maoria maibé agora koligasaun iha ona no iha prosesu tuir nia dalan atu forma governu,” líder bankada CNRT ne’e subliña.
Entretantu Primeiru Ministru Taur Matan Ruak aprejenta ona karta rejignasaun ba Prezidente Repúblika Francisco Guterres Lú Olo, iha loron Tersa (25/02/2020), iha Palásiu Prezidensiál Nicolau Lobato, Bairro-pité, Dili.
Iha parte seluk, Prezidente Repúblika Francisco Guterres Lú Olo simu tiha ona karta pedidu sorumutu ho koligasaun foun lideradu Prezidente CNRT, Kayrala Xanana Gusmão, iha Palásiu Prezidensiál Nicolau Lobato, Bairro-pité, Dili.
Fonte kredivel Timor Post iha Palásiu Prezidensiál haktuir, koligasaun mak hato’o pedidu sorumutu ho prezidente repúblika iha semana kotuk, maibé prezidente repúblika seidauk desidi loron sorumutu nian tanba sei okupadu ho ajenda seluk.
Líder máximu husi partidu neen inklui CNRT, PD, KHUNTO, UDT, FM no PUDD asina ona akta koligasaun iha Sede Nasionál Partidu CNRT, Bairro dos Grilhos, Dili, iha loron Sábadu (22/02/2020).
Prezidente CNRT, Kayrala Xanana Gusmão hatete, partidu neen ne’e hatudu iha ona forma ba formasaun governu foun hodi nune’e bele hakotu impase polítika atuál.
Entretantu iha loron Sesta (21/02/2020), Prezidente Repúblika Francisco Guterres Lú Olo, afirma, prontu fó apoiu ba kualkér koligasaun foun ne’ebé forma husi partidu polítiku sira atu forma Governu foun.
Lú Olo dehan, governu foun ne’ebé iha hodi hakat liu impase polítika rai-laran.
“Ha’u hanoin importante maka partidu polítiku sira buka malu ba, depois maka bele fó hatene ba Prezidente Repúblika, kona-ba Governu ida ne’ebé maka sente ba di’ak atu bele lori ita-nia rai ne’e bá-oin. Prontu, Prezidente Repúblika sempre fó apoiu nafatin, atu ita bele ultrapasa krize ida-ne’e, atu bele hadi’a fali ita-nia Governu. Ita hakarak iha governasaun ida-ne’ebé sustentável durante tinan rua ka tolu nia laran, hodi iha fali orsamentu, iha fali programa atubele hala’o dezenvolvimentu”, Lú Olo subliña.
Maske nune’e, Sekretáriu Jerál Partidu FRETILIN, Marí Bim Amude Alkatiri afirma, koligasaun foun ne’ebé forma husi CNRT, PD, KHUNTO, UDT/FM no PUDD ne’e sei la moris hodi forma governu dasia.
Alkatiri la fó tan rajaun husi nia deklarasaun ne’e hodi hatete de’it liafuan badak katak sei la moris.
“Sei La Moris,” Alkatiri hatan ba pergunta jornalista sira nian kona-ba pontu de vista ba koligasaun foun ne’ebé lidera husi Prezidente CNRT, Kayrala Xanana Gusmão preparadu ba formasaun governu foun hodi hakotu impase polítika iha rai laran.
Sekretáriu Jerál FRETILIN ne’e ko’alia ho jornalista sira bainhira partisipa selebrasaun loron veteranu ba datolu iha palásiu Governu, Dili, Tersa (03/03/2020). (cao)
785 total views, 3 views today
![Like](https://timorpost.com/wp-content/plugins/36/public/assets/img/reactions/like.gif)
![Love](https://timorpost.com/wp-content/plugins/36/public/assets/img/reactions/love.gif)
![Haha](https://timorpost.com/wp-content/plugins/36/public/assets/img/reactions/haha.gif)
![Wow](https://timorpost.com/wp-content/plugins/36/public/assets/img/reactions/wow.gif)
![Sad](https://timorpost.com/wp-content/plugins/36/public/assets/img/reactions/sad.gif)
![Angry](https://timorpost.com/wp-content/plugins/36/public/assets/img/reactions/angry.gif)
![Lú Olo La Dekreta Pedidu Rejignasaun TMR Taka Dalan ba Formasaun Governu Dasia](https://timorpost.com/wp-content/uploads/2020/03/87967015_858136431304631_2985063877730893824_o.jpg)
Bele hare Video Seluk :