DILI (timorpost.com)—Prezidente Repúblika (PR), José Ramos Horta ho delegasaun, Sesta Feira (15/09/) hala’o viajen ba Estadu Unidus Amerika hodi partisipa serimónia Asembleia Jerál ONU ba dala 78 tinan 2023 ne’ebe sei halao iha sidade Nova Yorke.
Prezidente Repúblika, sei iha Nova Yorke hahú husi loron 17 to’o 23 fulan-Setembru 2023.
Prezensa PR Horta reprezenta estadu Timor-Leste nia naran sei fó diskursu iha sesaun Asembleia Jerál ONU ba dala 78.
Lider mundu sira hamutuk iha Nova Yorke ba abertura sesaun Asembleia Jerál ONU ba dala 78 no atu partisipa iha Debate Jerál nivel aas anual ho tema “Rekonstrui konfiansa no hametin solidariedade global, Aselera asaun kona-ba Ajenda 2030 no ninia Objetivu sira Dezenvolvimentu Sustentavel nian ba paz, prosperidade, progresu no sustentabilidade ba ema hotu”.
Prezidente Timor-Leste sei fó deklarasaun nasionál iha Debate Reuniaun Jerál ONU ba dala 78 iha loron 21 fulan-Setembru 2023, atu fahe progresu ne’ebé Timor-Leste atinji ona iha dezenvolvimentu polítiku no ekonómiku iha tinan hirak ikus ne’e.
Xefe Estadu mós sei partisipa iha diálogu kona-ba Dezenvolvimentu Sustentavel ho tema “Halo Rezilênsia no la husik ema ida iha kotuk.”
Prezidente mós sei marka prezensa iha Resesaun ida-ne’ebé organiza husi Prezidente Estadus Unidus Amérika, Jose Robinette Biden Jr.
Prezidente Ramos Horta sei hato’o diskursu importante ida kona-ba “Investimentu iha Seguransa Ai-han: Solusaun inovativu sira atu rezolve Krize Hamlaha,” iha Sede Nasoins Unidas nian.
Premiu Nobel da Paz ne’e mós sei partisipa iha eventu ida ne’ebé organiza husi Misaun Tailándia kona-ba “Promove Parseria ba ita-nia futuru komún Haforsa Parseria Multi-Stakeholder ba Aselera ODS iha ASEAN, no iha Organizasaun Mundial Saúde (OMS) organiza konferénsia kona-ba “Prevensaun no Kontrola Moras La Komunikavel”.
Alende ne’e, PR sei partisipa iha Eventu Paralel Nivel Aas kona-ba Reforsa Solidariedade Global, Hametin Dame no Konstrui Rezilênsia iha Pais sira ne’ebé afetu husi konflitu no frajilidade, ne’ebé organiza husi 974, iha loron 22 fulan-Setembru 2023.
Eventu ne’e organiza hamutuk husi Timor-Leste no Sierra Leoa, ne’ebé mak nu’udar Prezidente 974 atuál.
Xefe Estadu mós sei partisipa iha eventu paralel ne’ebé organiza husi Millennium Corporation Challenge kona-ba Investimentu ho Impaktu Boot Timor-Leste sai hanesan benefisiáriu ida husi fundu MCC. Iha Jullu 2022, Timor-Leste no Estadus Unidus Amerika liuhosi Millennium Corporation Challenge asina Akordu Kompakta. Estadus Unidus fó subvensaun 420 million ba Timor-Leste ba programa rua, Programa kona-ba Tratamentu Bee fo’er no Danasaun no Programa Edukasaun ba Edukadór Ensinu Sekundáriu.
Entretantu, eventu paralel sira ne’e, xefe estadu sei hala’o reuniaun bilateral no mós multilateral, sei finaliza atividade nivel aas iha Nova Yorke iha loron 24 fulan Setembru.
2,418 total views, 6 views today
Bele hare Video Seluk :
Subscribe to Timorpost
