Dili (Timor Post) – Prezidente Repúblika (PR), José Manuel Ramos Horta, afirma Estadu tenke sukat didi’ak dividas ho Timor Telekom.
Nia hatete, Estadu rasik tinan lubuk la selu dividas ne’ebé Timor Telekom iha, Ministériu lubuk ida halo komunikasaun oin-oin depois haluhan tiha atu selu dividas ne’ebé iha.
“Entaun loloos ita-nia Estadu la bele hanesan debedór ne’ebé la selu dividas ho Timor Telekom no ida ne’e la’ós falla VIII Governu Konstitusionál nian, maibé hahú kedas husi Primeiru Governu mai to’o ohin loron, totál dividas Estadu Millaun 5USD,” nia dehan hafoin vizita Telekomunikasaun Timor Telekom Kaikoli, Kuarta (13/07).
Nia dehan, Timor-Leste rai kiik oan ho populasaun 1.300.000.000, no utilizadór sira ne’e uitaun no bainhira loke kompañia hotu-hotu mai, no balun sei mate, no bai-bain iha mundu ida ne’ebé mate ne’e, empreza sira ne’ebé fraku.
“Ha’u espera Primeiru Ministru, Taur Matan Ruak, laran luak no ema di’ak, la gosta halo dividas, entaun nia rasik mak hanesan Xefe Governu ida ne’ebé di’ak sei resolve dividas hotu-hotu,” nia hateten.
Estadu tenke hanesan debedór onradu, tanba la’ós de’it problema ho Timor Telekom, maibé iha problema oi-oin ida mak sexta bázika, tanba sira ne’ebé Sexta bázika ne’e, sira faan sasán entrega ba konsumedór Governu dezigna depois la selu.
“Klaru ha’u hatene katak, la’ós Governu lakohi selu, maibé birokrásia mak nei-neik tebe-tebes, no halo Timoroan lubuk ida la hetan pagamentu hodi difikulta empreza sira-nia moris,” nia dehan.
Tanba laiha kbiit atu halo konkorensia ho empreza sira seluk, entaun Estadu iha parseiru ho Timor Telekom no ida ne’e investimentu ida estratéjiku no kualkér nasaun ida iha mundu telekomunikasaun sai investimentu ida estratéjiku, no ne’e la’ós ligadu ho interese komersionál maibé interese nasionál.
Estadu tenke haree ida ne’e, didi’ak atu nia bele fó fasilidade di’ak liu tan, hodi hamenus impostu despeza eletrisidade, tanba Timor Telekom gasta osan boot ida ho ekipamentu no jeladór rasik atu la bele falla.
“Konta eletrisidade Timor nian karun tebe-tebes, purtantu se kompañia ne’e parsialmente Estadu nian tenke tau matan, no iha obrigasaun uza kompañia ne’e, no fó apoiu tanba Estadu mak iha póder, iha liman atu haree oinsá ajuda kompañia nasionál, seja Timor Telekom ou kompañia seluk ne’ebé kompañia nasionál Timor,” nia afirma.
Iha biban hanesan, Diretór Diresaun Juridika Relasaun Instituisaun, Timor Telekom, Manuel Carseres, hatete divida ne’ebé Governu seidauk selu to’o ohin loron, hanesan mós Prezidente Repúblika, José Ramos Horta, hatete Millaun 5USD.
Nia subliña, dividas ne’e, hahú kedas husi Primeiru Governu mai to’o ohin loron, la’ós VIII Governu de’it, selu uitoan-uitoan hein katak, laran luak, liuhusi Primeiru Ministru nian bele rezolve ona.
“Ami mós halo karta dala rua ona ba Primeiru Ministru, atu haree ajuda uitoan, uluk dividas ne’e besik Millaun 10 USD, agora sira selu ona Millaun 5USD. Iha maun boot Xanana nia tempu selu barak no iha Rui Araujo nian selu barak mós, depois sira muda tiha sistema katak, Ministériu ida-idak fulan-fulan selu kedas. Ami sei ko’alia nafatin ho Ministériu Finansas para bele rezolve tiha situasaun ne’e,” nia hakotu.
985 total views, 3 views today
