DILI (timorpost.com) — UN Resident Coordinator Roy Trivedi, ohin loron Tersa (04/10) hakaat bá palásiu prezidenziál Bairru-Pité, Hori halo despedida formál ida ho Prezidente Repúblika José Ramos Horta, no agradese ba nia apoiu enkorajamentu durante nia serbisu iha Timor-Leste dezde tinan 2018.
“Iha fulan Outubru nia rohan, ha’u sei kompleta ha’u-nia serbisu nu’udar Koordenadór Prezidente ONU nian iha Timor-Leste. Maibé molok iha loron 16 fulan Outubru, ha’u sei husik hela Timor-Leste, iha semana rua tuir mai mak ha’u-nia semana ikus iha nasaun ne’e,” Roy Trivedi dehan hafoin remata enkontru ho Xefe Estadu.
Roy Trivedi relata ninia Predessesor sei to’o iha Timor-Leste iha fulan Novembru, oras ne’e nia serbisu hela ba ONU Nova Iorke no hala’o ona nia knaar iha Subaon, Sambia no nasaun sira seluk, nune’e entre sira rua kontaktu ona hanesan parte ida husi entrega serbisu ba malu.
“Onra no previlejiu ida ba ha’u atu serbí iha Timor-Leste durante tinan lima liu, ha’u agradese tebes ba ema hotu ne’ebé fó apóiu mai ha’u iha ha’u-nia serbisu inklui Líder Polítiku sira, Ministériu sira, Sekretáriu Estadu sira, Ofisiál sira, Governante sira, Grupu Sivíl sira, komunidade no parseiru dezenvolvementu sira,” nia afirma.
Nia mós agradese tebes ba kolega ONU sira no ninia família rasik ne’ebé apóiu nia durante periodu ne’e sira hamutuk hasoru dezafiu sira ne’ebé mosu iha Pandemia Covid-19, Inundasaun no dezafiu dezenvolvimentu sira seluk.
“Ha’u fiar katak, Timor-Leste agora iha pozisaun di’ak liu iha ninia dezenvolvimentu ba tempu naruk ne’ebé iha tinan 2018 ha’u tuun mai,” Roy dehan.
Enkuantu tuir Roy Trivedi, katak ida ne’e hanesan rezultadu husi serbisu líder nasionál sira no povu iha nasaun ne’e nian, ne’ebé hetan apóiu husi parseiru dezenvolvimentu hotu-hotu. Nia haksolok tebes tanba ekipa nasionál ONU nian halo ona kontribuisaun ne’ebé ho folin boot ba progresu ne’e.
Alende ne’e nia mensajen ohin loron mak Timor-Leste tenke kontinua progresu ne’e tanba iha tinan hirak oin mai iha mundu tomak sei lori difikuldade no dezafiu barak liu tan. Agora la’ós tempu atu deskansa, maibé tenke kontinua serbisu, hodi harii nasaun ida ne’ebé kontente, saudavel, seguru, sustentável no prosperu ba ema hotu.
“Ha’u rasik sei kontinua apoiu dezenvolvimentu Timor-Leste iha dalan oi-oin, maski ha’u sai ona husi ha’u-nia serbisu ne’e. Nune’e obrigada ba imi hotu-hotu tanba halo ha’u+nia serbisu iha Timor-Leste ksolok tebes no kumpre duni,” Roy Trivedi hakotu.
2,620 total views, 3 views today
Bele hare Video Seluk :
Subscribe to Timorpost
