Dili (timorpost.com)—Diretór Ezekutivu Organizasaun Noun Governamentál Timor-Leste (FONGTIL), Valentim da Costa Pinto, lamenta ho aktus administradór munisípiu Aileu nian ne’ebé mak uza podér hodi hapara atividade debate públiku ne’ebé realiza husi Movimentu Juventude Munisípiu Aileu (MJMA), iha Sábadu (15/04).
Nia dehan, Joven sira ne’ebé mak organiza diálogu hodi ko’alia ba malu ou asuntu sira ne’ebé mak iha, primeiru aktu ida ne’e, foti poor razaun saida de’it la permite.
“Ita labele limita liberdade espresaun iha nasaun demokrasia ne’e, ita so bele asegura no mós fó apresiasaun no motiva atu ita nia joven sira nafatin kriativu hodi halo dezenvolvimentu iha munisípiu refere, atu nafatin mantein hatudu kualidade di’ak,” nia dehan ba Timor Post iha ninia serbisu fatin, Kaikoli, Segunda (17/04).
Nia aumenta, presiza respeita atividade hotu tanba saida de’it mak sidadaun sira ne’ebé iha intensaun atu promove ou divulga kona-ba informasaun sira ne’e tenke apresia.
“lta labele ba devia ou kansela ka limita fali atividade ne’ebé mak joven sira promove hodi dezenvolve munisípiu ne’e rasik, bainhira ita hapara atividade ne’ebé mak nia intensaun hodi promove prosesu konstrusaun ba munisípiu ne’e, ita rasik kontra ona liberdade espresaun iha nasaun direitu demokrátiku ne’e rasik, tanba ne’e ami lamenta”, nia haktuir.
Se enkuantu, bainhira iha debate ou diskusaun iha krime ruma, nasaun ne’e iha Polisia atu fó Chamada ba sira.
“Mais ita nia joven sira kuandu halo diskusaun hanesan ne’e la iha deferénsia ba iha diálogu sira ne’ebé ita halo iha Dili, Talk Sow sira ne’ebé halo iha televizaun, mais tanba sá mak tenke ba hapara kolega sira nia atividade, ne’e ami lamenta,”
Nia subliña, loloos ne’e nu’udar Administradór tenke akompaña ho atividade atuál, tenke promove, tanba ema hotu hakarak lori informasaun ba sidadaun sira hodi komprende liu-liu kona-ba saida mak Governu sei presiza halo ou Governasaun tuir mai ne’e halo.
“Ami lamenta, tanba atividade diskusaun, ne’e la halo Krime atu perturba ba atividade Públiku, ne’ebé administradór ita tenke komprende katak, ambiente diskusaun sira hanesan ne’e iha nasaun demokrátiku ne’e presiza akontese,” Valentim afirma.
Antes nia hakotu, tuir nia (Valentim) hanoin katak, hanesan administradór talves nia orgullu no kontente ho ninia Joven sira Kriativa hodi kontribui ba buat sira hanesan ne’e, loke diskusaun ba entidade hotu-hotu, tanba ne’e iha parte ida ema hanaran Edukasaun Públiku.
Tanba ne’e, hanesan administradór tenke kontente tanba nia joven sira kriativu ba sensibilidade ba buat sira ne’e iha Públiku, envés nia tenke kontente no agradese sei joven sira halo hanesan ne’e.
“Ha’u hanoin ba futuru, bainhira akontese hahalok hanesan ne’e, presiza hadi’a la’ós ba hapara, ita imajina nasaun Timor ne’e nasaun demokrasia, ema hotu iha liberdade ba espresaun, tanba ne’e labele uza podér hodi hapara atividade ne’ebé mak joven sira halo, ne’e ita hamosu ona problema boot iha nasaun demokrasia ne’e,” nia hakotu.
11,145 total views, 9 views today
Bele hare Video Seluk :
Subscribe to Timorpost
