Timor Post (15/06/2020)- Ministru Finansas (MF), Fernando Hanjam, relata iha enkontru rutina ho Primeiru Ministru Taur Matan Ruak Segunda (15/6) relata ezekusaun orsamentu fundu COVID-19 atinje daudaun porsentu 60,4.
Iha biban ne’e Ministru ho Xefe Governu kolia mós kona bá levantamentu fundu infraestrutura hodi reforsa kaixa tezouru nune’e mós aumenta tan ba fundu COVID-19.
“Ohin hasoru Primeiru Ministru ne’e hanesan enkontru rotina ministériu nian kada semana iha loron segunda no mai atu informa de’it kona-ba ezekusaun orsamentu ba fundu covid-19 nian, no mós kona ba levantamentu orsamentu fundu petrolíferu atu aumenta tan ita nia osan iha kaixa tezouru no mós fundu covid-19 ninian. Kona-ba fundu covid nian ita atinje ona 60,4% inklui mós subsídiu ba uma kain sira ne’e”, hateten Fernando Hanjam hafoin remata enkontru ho Xefe Governu iha Palasiu Governu segunda (15/6).
Ministru akresenta levantamentu fundu petrolíferu dala ida ne’e atu hodi aumenta tan ba orsamentu 61 millions restu ne’ebé iha hodi halo pagamentu ba projetu sira ne’ebé maka iha hela andamentu.
“Hanesan despeza sira ne’ebé mak saúde halo daudauk, hotelaria sira ne’ebé mak uza halo kuarentena to’o agora seidauk halo pagamentu ho catreen sira ne’e hotu, inklui ona ho apoiu governu nia 60% ba kompañia sira hodi selu traballadór sira nia saláriu durante estadu emerjénsia fulan tolu” Ministru hakotu.
Jornalista: Jaime Pires
Editor: Mariano Martins
805 total views, 3 views today
Bele hare Video Seluk :
Subscribe to Timorpost
