DILI, (timorpost.com)— Reprezentante Banku Mundiál iha Timor-Leste, Bernard Harborne, aprezenta relatóriu kona-ba situasaun ekonomia atuál iha Timor-Leste.
“Banku Mundiál sempre prodús relatóriu kona-ba situasaun ekonomia, nune’e iha tinan kotuk kresimentu ekonomia Timor-Leste sa’e to’o porsentu 4, iha tinan ida-ne’e komesa sa’e ona maiz ou menus 3.6, maske la’o neneik liu maibé espera katak iha tinan ida-ne’e, iha fulan hira mai tan, tamba investimentu kapitál mós daudauk ne’e la’o ona, iha projetu sira Governu nian maibé espera katak bele kria tan kampu servisu ba ema barak. Kontribuente boot ida mak kresimentu husi despezas Governu nian tamba sira mak fatór ida ne’ebé sei kontribui mós ba kresimentu ekonomia Timor-Leste nian, infelizmente despezas ne’ebé daudauk ne’e Governu Timor-Leste uza ne’e menus liu iha investimentu”, Reprezentante Banku Mundiál iha Timor-Leste, Bernard Harborne, informa iha kampus IOB Fomentu, Tersa, (27/02), bainhira lansa relatóriu Banku Mundiál nian.
Nia hatutan, loron 26 fulan-Feveréiru tinan ne’e, hanesan loron importante ida ba Timor-Leste tamba sai ona membru Organizasaun Mundiál Komérsiu (OMK), ne’e hanesan sinál di’ak ida atu Timor-Leste bele uza oportunidade ne’e ho di’ak, maibé tenke kuidadu mós iha parte sira hanesan, setór kafé ne’ebé hanesan produtu esportasaun prinsipál Timor-Leste nian maibé produsaun rasik sei menus hodi responde ba merkadu globál.
“Sai ona membru OMK automatikamente investimentu husi estranjéiru komesa nakloke hodi mai investe iha Timor-Leste, nune’e oinsá mak Timor-Leste bele prodúz fila-fali produtu ne’ebé di’ak. Governu tenke kria dalan ka mekanizmu ne’ebé di’ak hodi asegura produsaun kafé ne’ebé di’ak no produsaun seluk tan, i oinsá mak atu aselera mós prosesu rehabilitasaun aeroportu, otelaria, restaurante sira, nune’e Timor-Leste bele fó servisu ne’ebé di’ak hodi akomoda estranjéiru sira ne’ebé hakarak halo investimentu”, nia informa.
Daudauk ne’e Timor-Leste sai ona membru ba OMK, la kleur tan sai ona membru ba ASEAN nune’e sei loke dalan ba estranjéiru, la’os de’it turista maibé mós investór estranjéiru ne’ebé iha interese atu investe iha Timor-Leste. Espera katak bele dada fiu Fibra ótika hodi fasilita internet.
“Pontu ida tan maka, daudauk ne’e iha prosesu hela oinsá atu dada fibra ótika husi Indonézia no Austrália mai Timor-Leste, espera katak fin husi tinan ida-ne’e bele realiza ona, ne’eduni Governu tenke kria kondisaun hodi akomoda ekonomia dijitál ida-ne’e, tamba nia fó benefísiu boot ba jerasaun foun”, Bernard akresenta.
Reprezentante Banku Mundiál ne’e hakutir, daudauk ne’e Timor-Leste kategoria hanesan nasaun ne’ebé ho impréstimu ki’ik liu husi Banku Mundiál kompara ho nasaun sira seluk, Banku Mundiál daudauk ne’e fó impréstimu mai Timor-Leste ho montante millaun dóllar $300 ne’ebé sei selu fila-fali ho durasaun tinan 40 nia-laran.
Impréstimu refere Governu halo bainhira hahú hetan osan husi produsaun fundu petrolíferu iha tinan 2011, mak iha lei ida ne’ebé fó dalan ba nasaun sira inklui Timor-Leste atu halo impréstimu ba instituisaun finanséiru mundiál sira.
“Iha buat tolu ne’ebé importante atu asesu ba kréditu sira iha banku, pontu primeiru mak lei bankaria nian ne’ebé presiza iha reforma balun, pontu ida tan mak reforma lei ba rai nian no ikus liu mak lei ba garantia sira bainhira ema halo impréstimu iha banku, garantia mós ba materiál móveis sira hanesan karreta ga motorizada ne’ebé bele uza hanesan garantia hodi halo impréstimu iha banku”, nia esplika.
Iha atividade lansamentu relatóriu husi Banku Mundiál ne’e partisipa husi estudante IOB.(*)
3,351 total views, 3 views today
Bele hare Video Seluk :
Subscribe to Timorpost
