DILI, (timorpost.com)— Diretór Servisu Edukasaun Munisípiu Vikeke, Domingos Brandão, hatete, relasiona ho polítika Governu Konstitusionál da-IX liuhosi Ministériu Edukasaun, ne’ebé hapara profesór kontratadu sira sai problema ba prosesu aprendisajen tanba fulan rua menus profesór hodi hanorin estudante sira.
Aliende ne’e, profesór sira ne’ebé daudauk ne’e hanorin hela iha eskola sira sei hein hela prosesu transferénsia.
Diretór ne’e hatete, problema iha prosesu aprendizajen tamba fulan-Feveréiru atu remata ona maibé profesór menus atu hanorin estudante sira, no tuir kalendáriu Ministériu Edukasaun nian katak estudante sira sei hahú prosesu ezame ba primeiru periodu monu iha fulan-Abril maibé prezensa profesór sira-nia iha aula laran ladún másimu.
“Ita tama ba fulan-Feveréiru atu hotu ona no tama ba fulan-Marsu no tuir kalendáriu edukasaun nian katak, iha fulan-Abril estudante sira ezame ona ba primeiru periodu, entaun ne’e problema duni tamba to’o agora mestri sira la hanorin di’ak ho estudante sira, entaun estudante sira hasoru problema iha primeiru periodu”, Diretór Servisu Edukasaun munisípiu Vikeke, hatete ba Timor Post, hafoin partisipa lansamentu relatóriu avaliasaun kona-ba mekanizmu referál violénsia bazeia ba jéneru iha eskola no prosesu fila hikas ba eskola, iha City-8 Manleuana, Segunda, (26 02).
Nia hatutan, “Iha Vikeke eskola la taka maibé menus profesór tamba eskola balun sei iha nafatin mestri ida ka rua, hanesan iha eskola Nutetu, eskola Ossu Kaioa, eskola Defalasi, eskola Waimori vila, no iha eskola Tula-Oli, programa eskolár la’o nafatin maibé menus profesór de’it”.
Nia dehan, profesór kontradu sira iha munisípiu Vikeke hamutuk ema na’in-155 mak kontratu remata iha loron 31 fulan-Dezembru tinan 2023, fó impaktu ba estudante sira-nia estudu, tamba dalaruma kada eskola iha de’it profesór na’in -2 de’it ,entaun profesór la sufisiente no eskola iha área rurál mak hetan impaktu maka’as tanba profesór ne’ebé hanoin mesak profesór sira ne’ebé hetan kontratu iha tinan 2023.
“Ami presiza tebes profesór tamba profesór sira-nia kontratu remata iha ema na’in-155, no tuir dadus ne’ebé ONG (Organizasaun Naun Governamentál) belun halo ba ensiñu báziku ne’e dehan presiza ida de’it, maibé na realidade laiha tamba ami-nia mestri sira atu ba reforma kuaze ema na’in-160 resin no profesór sira besik atu reforma iha ema na’in-80 resin, no ba sira ne’ebé mak moras estruk, no balun moras permanente, ho nune’e mak ami presiza tan profesór na’in-400 resin, tamba daudaun ne’e profesór menus atu koloka sira ba hanorin”, nia esplika.
Nia akresenta, edukasaun munisípiu Vikeke koko normaliza prosesu aprendisajen liuhosi priense profesór permanente ba fatin sira ne’ebé mamuk liuliu iha área rurál sira, tanba profesór iha área urbana labele ba apoiu eskola sira iha área rurál tanba seidauk iha polítika transferénsia, liuliu profesór sira husi eskola ida ba eskola seluk, tanba ne’e, daudauk ne’e sei hein programa edukasaun nian
Daudaun ne’e eskola sira iha munisípiu Vikeke presiza profesór atu bele ba hanorin tamba tuir dadus ne’ebé mak ONG Belun fó katak eskola ensiñu báziku presiza profesór ida de’it, maibé tuir loloos sira presiza profesór barak tamba kuaze profesór atus 4 resin mak ba reformadu, no profesór sira balun moras, balun moras permanente, ho nune’e mak presiza profesór barak.(*)
3,768 total views, 3 views today
Bele hare Video Seluk :
Subscribe to Timorpost
