DILI (timorpost.com) – Governu liuhosi Ministériu Edukasaun (ME) halo ona kuadru pesoal hodi identifika no sei halo sosializasaun ba profesór sira ne’ebé mak idade reformadu.
Ministra Edukasaun, Dulce de Jesus Soares, hatete, ministériu sei tau nafatin orsamentu ba infraestrutura eskolár, nune’e mós Governu halo ona kuadru pesoál no sosializa ho profesór idade reformadu.
“Ministériu Edukasaun kontinua tau orsamentu ba infraestrutura eskolár ba projetu 2023 nian no projetu komunitariu nian. Nune’e mós governu halo ona kuadru pesoál hodi identifika no sei halo sosializasaun ho profesór idade reforma. Ita boot sira akompaña karik lansa ona iha munisípiu sira, no mós orsamentu ba 2024 kontinua aloka ba infraestrutura eskolár,” Dulce hateten ba Jornalista sira hafoin hasoru malu ho Prezidente Republika iha Palasiu Prezidensiál Nicolau Lobato, Bairru Pité, Sesta (09/02).
Maibé kona-ba menus profesór sira, governu liuhusi Ministériu Edukasaun halo ona kuadru pesoál, entaun ministériu identifika ona eskola ne’ebé mak falta profesór.
“Ministériu sei halo transfere ba eskola sira ne’ebé mak profesór barak ba fali eskola ne’ebé mak profesór menus, ministériu halo tuir kuadru pesoál ne’ebé mak ami halo tiha ona,” Governante ne’e hateten.
Nia dehan, Ministériu Edukasaun identifika ona katak kuaze eskola 40-resin mak menus profesór, tanba ne’e iha tempu badak sei halo husi transferensia depois halo kolokasaun, bainhira iha ona bolsa kandidatu profesores.
Nune’e mós, kona-ba reforma obrigatóriu ba profesór sira ne’ebé mak entrega pedidu ba Ministériu Edukasaun, ne’e tenke iha tanba ministériu sei identifika ho kle’an atu haree.
Tanba tuir dadus iha duni, tanba ne’e sei aprosima atu ko’alia ho sira no hamutuk ho Institutu Nasionál Seguransa Sosiál (INSS) ho Komisaun Funsaun Publika (KFP) atu identifika profesór balun, tanba profesór balun maski idade avansadu maibé nafatin hanorin.
“Ita sei aprosima ho dalan ne’ebé di’ak liu, atu nune’e parte hotu bele kontente simu karik tama reforma ka lae, maibé dadus husi KFP hatudu katak ema sira ne’e tama ona iha idade reforma,” nia hatutan.
Iha semana oin, ME sei hala’o enkontru ho INSS depois mak sei halo planu, para tun hamutuk ba halo sosializa fila fali, maski iha pasadu halo tiha ona sosializasaun, maibé hakarak ko’alia fila fali ho profesór sira ne’ebé mak tama ona idade reforma.
9,135 total views, 3 views today
Bele hare Video Seluk :
Subscribe to Timorpost
