DILI (timorpost.com) – Eis Ministru Interiór, Rogerio Tiago Lobato, hatete to’o oras ne’e timoroan seidauk barak mak iha kapasidade iha área relevante tanba ukun-nain sira hanoin de’it mak ukun maibé la investe iha área edukasaun.
“Ha’u sempre dehan tenke investe barak iha edukasaun, ita nia ema tenke matenek, tenke domina kuñesimentu, so hanesan ne’e maka ita nia rai ne’e bele ba oin”, Fundador RDTL ne’e sujere. Ukun na’in sira maka hanoin de’it ukun, la tau importansia ba kualidade rekursu umanu iha rai laran, la seriu investe iha edukasaun, defisil tebes nasaun ida-ne’e atu hetan dezenvolvimentu ida di’ak iha futuru, ne’e susar atu hetan. Tenke iha votande polítika atu investe edukasaun, halo timor-oan tenke matenek”, Rogerio Tiago Lobato, hato’o preokupasaun ne’e ba jornalista sira hafoin partisipa komemorasaun Loron Proklamasaun Independénsia Unilaterál 28 Novembru ba dala-48 (28 Novembru 1975-2023), iha Palásiu Prezidensiál Prezidente Nicolau Lobato, Bairru Pite, Dili, Tersa, (28/11/2023).
Nia hatutan rikusoin durante ukun-an tinan 20 resin ona hahú husi tinan 2002 to’o ohin loron seidauk sériu investe iha área edukasaun tanba ne’e Timor-Leste kontinua mukit matenek iha área espesialidade sira.
“Ha’u sempre dehan, riku-soin boot liu Timor nian ne’e la’os mina-rai, la’os gás naturál, riku-soin Timor nian ne’e maka ema matenek, ho koñesimentu, ha’u sente katak iha tinan hirak ne’e ita ladún fó importánsia ba iha edukasaun. Ita atu kee de’it ita nia mina mós ita tenke ba bolu ema seluk husi liur mai kee ita nia mina, tanba ita enjineiru atu kee ita nia mina laiha”, Rogério, informa.
Tanba ne’e, nia sujere ba órgaun Estadu tomak, liuliu Governu tenke investe barak iha área edukasaun, atu nune’e timoroan tenke matenek barak, tenke domina koñesimentu iha área espesialidade sira, tanba liuhosi rekursu umanu di’ak mak dezenvolvimentu nasaun bele la’o ho di’ak ba oin.(*)
1,365 total views, 3 views today
Bele hare Video Seluk :
Subscribe to Timorpost
